دەسەڵاتدارانی ئەفغانستان دەڵێن سیستەمی دژە موشەکیان داناوە لە فڕۆکەخانەی کابوڵ بۆ تێکشکاندنی ئەو موشەکانەی دەگیرێنە فڕۆکەخانەکە.
ئەم هەنگاوەی دەسەڵاتدارانی ئەفغانستان هاوکاتە لەگەڵ هێرشە بەرفراوانەکانی تاڵیباندا لە سەرانسەری وڵاتەکەدا.
واشنتۆن و هاوپەیمانەکانیشی لە پرۆسەی کۆتاییهێناندان بە ئەرکی لەشکریی خۆیان لە ئەفغانستاندا، هەرچەندە یاخیبوان لە ئێستادا وەک دەگوترێت دەستیان گرتووە بەسەر نزیکەی لە سەدا 85ی وڵاتەکەدا، بەڵام حکومەتی ئەفغانستان ئەمە پشتڕاست ناکاتەوە و گومانی لەسەر ئەو جۆرە ڕاگەیەندراوانە هەیە و تا ئامادەکردنی ئەم هەواڵەش هیچ لایەنێکی سەربەخۆ ئەو جۆرە ڕاگەیەندراوانەی پشتڕاست نەکردۆتەوە.
وەزارەتی ناوخۆی ئەفغانستان لە ڕاگەیەندراوەکەی ئەمڕۆ یەکشەممەیدا دەڵێت "لە کاتژمێر 2ی بەرەبەیانی ئەمڕۆ یەکشەممەوە ئەو سیستەمی دژە موشەکە دانراوە و لەسەر ئاستی جیهانیش سەلمێندراوە کە ئەم سیستەمە بە سودە بۆ بەرەنگاربوونەوەی هەموو جۆرە هێرشێکی موشەکی."
کاربەدەستانی ئەفغانستان باس لە هیچ وردەکارییەکی تری ئەم سیستەمی دژە موشەکە ناکەن و ناشڵێن چ جۆرێکە و کێش بۆی داناون، تەنها ئاماژە بەوە کراوە وەک دەڵێن "دۆستە بیانییەکانمان داویانە بە ئەفغانستان."
ئەجمال عومەر شینواری، وتەبێژی هێزە ئاسایشییەکانی ئەفغانستان دەڵێت "ئەم سیستەمی دژە موشەکە، تەکنەلۆژیایەکی نوێ و ئاڵۆزە و لە ئێستادا دۆستە بیانییەکانمان کاری پێدەکەن و ئێمەش وەک هێزە ئاسایشییەکانی ئەفغانستان لە پرۆسەی دروستکردنی تواناییەکانداین بۆ بەکارهێنانی ئەم سیستەمەی دژە موشەک."
تاڵیبان بەردەوام هێرشی موشەکی و هێرشی خومپارەیی دەکاتە سەر هێزەکانی حکومەتی ئەفغانستان لە سەرانسەری وڵاتەکەدا، بە هەمان شێوەش ئیسلامییە جیهادییەکانی داعشیش لە ساڵی 2020ەوە لەو جۆرە هێرشانە دەکەنە سەر پایتەختی ئەفغانستان و شوێنەکانی تری وڵاتەکەش.