کۆسۆڤۆ بە فەرمی باڵیۆزخانەی خۆیی لە شاری ئۆرشەلیم کردەوە و ئەم هەنگاوەش وەک دانپێدانانێکە بەو شارە مشتومڕ لەسەرە کە پایتەختی ئیسرائیلە.
لەو مەڕاسیمەی ئەمڕۆ یەکشەممەدا، ئاڵای کۆسۆڤۆ لەبەردەم باڵەخانەی باڵیۆزخانەکەدا هەڵکرا و لە دەروازەکەشیدا بە هەڵکۆڵین نوسراوە، کۆماری کۆسۆڤۆ بە زمانەکانی ئەلبانی و عیبری و هەروەها بە ئینگلیزیش.
لە بەرامبەردا کۆسۆڤۆ، وەک یەکەم وڵاتێک کە زۆرینەی دانیشتوانەکەی موسڵمانن و داندەنێت بەوەی شاری ئۆرشەلیم کە عەرەبەکان پێی دەڵێن قودس، پایتەختی ئیسرائیلە، تەلئەڤیڤیش داندەنێت بە سەربەخۆیی کۆسۆڤۆ لە سیربیا.
ئەم بڕیارەی بریشتینا، نەک هەر لە وڵاتانی زۆرینە موسڵمانەوە ڕووبەڕووی ڕەخنە و ناڕەزایی بووەوە، بەڵکو لە ناو یەکێتی ئەوروپاشدا ڕەخنە لە کۆسۆڤۆ گیراوە.
دۆسێی ئۆرشەلیم، یەکێکە لە دۆسێ هەرە ئاڵۆزەکان لە قەیرانی نێوەان ئیسرائیلی و فەلەستینییەکاندا.
دەسەڵاتدارانی فەلەستینی بەردەوام باسی دەکەن کە "ئیسرائیلییەکان لە ساڵی 1967دا بە شێوەیەکی نایاسایی ڕۆژهەڵاتی قودس، پایتەختی دەوڵەتی فەلەستینیان داگیر کردووە."
دانۆڵد ترامپ، سەرۆکی پێشووی ئەمەریکا، خواستی کۆسۆڤۆ و ئیسرائیلی دەربڕی بۆ هەبوونی پەیوەندی دیپلۆماسی لە نێوانیاندا و ئەم ڕاگەیاندنەش هاوکاتی کۆبوونەوەیەکی لوتکەیی بوو بۆ گەیشتن بە ڕێککەوتنێک لە نێوان کۆسۆڤۆ و سیربیادا.
لە مانگی 2ی ڕابردوودا کۆسۆڤۆ و ئیسرائیل دەستیان کرد بە پەیوەندی دیپلۆماسی و ئەمەش ناڕەزایی بەلگرادی بەدوای خۆیدا هێنا، چونکە هێشتا داننانێت بەو هەرێمەی پێشوویدا.
تا ئێستا چین و ڕوسیا و هەروەها 5 وڵاتی یەکێتی ئەوروپاش دانیان بە سەربەخۆیی کۆسۆڤۆدا نەناوە.
قەیرانی سیربیا کۆسۆڤۆ بە یەکێک لە قەیرانە ئاڵۆزەکانی ئەوروپا دادەنرێت.
لەوەتای کۆسۆڤۆ لە سیربیا جیابۆتەوە هاوکاتی شەڕە خوێناویەکانی1998 – 1999 کە بە بۆردومانکردنی ئامانج و نیشانەکانی سیربیا کۆتایی پێهات لەلایەن هاوپەیمانێتی ناتۆوە، سیربیا دانینەناوە بە کۆسۆڤۆدا.
لەو شەڕەدا زیاتر لە 13 هەزار کەس کوژران و زۆربەشیان ئەلبانیاییە کۆسۆڤییەکان بوون.
زیاتر لە 10 ساڵە هەردوولا، بەردەوام لە وتووێژکردندان بە سەرپەرشتی یەکێتی ئەوروپا بۆ ئاساییکردنەوەی پەیوەندییەکانیان، بەڵام تا ئێستا بەرەوپێشچوونێکی ئەوتۆ نەهاتۆتە ئاراوە.