ڕۆژنامەوانێکی تر لە ئەفغانستان دەکوژرێت کە پێشتر وتەبێژی هێزەکانی پاراستنی گشتی وڵاتەکەی بووە.
زیائودان و دووان لە هاوڕێکانی لە کابوڵ، پایتەختی ئەفغانستان کوژراون پاش تەقاندنەوەی بۆمبێک کە ئۆتۆمێلەکەیانی کردبووە ئامانج، وەک لە ڕاگەیاندنەکەی وتەبێژی وەزارەتی ناوخۆی ئەفغانستاندا هاتووە.
تاریق عوریان دەڵێت، ئەو بۆمبەی زیائودان و دوو هاڕێکەی کوشتووە و کەسێکی تریشی بریندار کردووە، دەستکردی خۆجێیی بووە.
تا ئامادەکردنی ئەم هەواڵە هیچ لایەنێک بەرپرسیارێتی خۆی لەو هێرشە ڕانەگەیاندووە.
لەم چەند مانگەی ڕابردوودا، ڕووداوی کوشتنی ڕۆژنامەوانان و کەسایەتییە سیاسییەکان و مافناسان لە ئەفغانستان بە شێوەیەکی بەرچاو زیادیان کردووە.
دەسەڵاتدارانی ئەفغانستان و واشنتۆنیش ئەو هێرشانە لە ئەستۆی تاڵیبان دەنێت، لە کاتێکدا تۆڕە تێرۆرکارییەکەی دەوڵەتی ئیسلامی بەرپرسیارێتی خۆی لە هەندێک لەو هێرشانە ڕاگەیاندووە.
زیاد بوونی دیاردەی کوشتن لە کابوڵ و لە هەندێک هەرێمی تری ئەو وڵاتە بە شەڕ وێرانبووە لە کاتێکدایە دانوستاندنی ئاشتیانە لە نێوان تاڵیبان و حکومەتی ئەفغانستاندا لە مانگی 9ی ڕابردووەوە دەستیپێکردووە.
لە ئێستاشدا گەڕێکی نوێی ئەو دانوستاندنە لە دۆحە پایتەختی قەتەر دەستیپێکردۆتەوە پاش ئەوەی بۆ ماوەیەکی کاتیی دانوستاندن ڕاگیرا.