Accessibility links

ژمارەیەک شیعە ئاینزا لە پاکستان دەکوژرێن


کاربەدەستێک لە پاکستان دەڵێت، ژمارەیەک چەکدار هێرشیان کردۆتە سەر کرێکارانی کانە خەڵوزییەکان و پاش ڕفاندنی کرێکارەکان کە لە کەمایەتی شیعەکانن لە هەرێمی بەلوجستان، ئەوجا کوشتویانن.

موعەزەم عەلی، یەکێکە لە کاربەدەستانی هێزی لیفیز کە وەک پۆلیس و هێزی نیمچە لەشکرییە لەو ناوچەیەدا دەڵێت ئەو هێرشەی زوویەکی ئەمڕۆ یەکشەممە لە نزیک کانە خەڵوزی ماش ڕوویداوە و 48 کیلۆمەتر لە ڕۆژهەڵاتی کویتا پایتەختی هەرێمەکەوە دوورە.

موعەزەم دەڵێت "هێرشبەرەکان کرێکارەکانیان بردووە بۆ شاخەکانی نزیک ناوچەکە و لەوێ تەقەیان لێکردوون." و دەشلێت 6 کرێکاریان دەستبەجێ گیانیان لەدەستداوە و 5 کرێکارەکەی تریشیان لە ڕیدا بەرەو نەخۆشخانە بەهۆی سەختی برینەکانیانەوە گیانیان لەدەستداوە.

بەپێی لێکۆڵینەوە بەراییەکان، هێرشبەرەکان کرێکارەکانی کانە خەڵوزییەکانیان ناسیوە و زانیویشیانە ئەو ژمارەیەیان لە شیعە ئاینزاکانن و لە تیرەی هەزارەن و دووریان خستونەتەوە و کوشتویانن و کرێکارەکانی تریان جێهێشتووە.

تا ئامادەکردنی ئەم هەواڵە هیچ لایەنێک بەرپرسیارێتی خۆی لەو هێرشە ڕانەگەیاندووە، بەڵام ڕێکخراوی سەربازی جەنجەوی کە ڕێکخراوێکی سوننە ئاینزای توندڕەوە و قەدەغەکراویشە، پێشتر تیرەی هەزارەی شیعەکانی کردۆتە ئامانجی هێرشەکانی.

دیمەنە ڤیدیۆییەکان لە تەلەفزیۆنە خۆجێیەکاندا، نیشانیان داوە هێزە ئاسایشییەکان گەمارۆی ناوچە شاخاویەکانیان داوە و ئەمبۆلانسەکان و ماشینی تریش دەچوون بەرەو ئەو ناوچەیە بۆ هەڵگرتنەوەی تەرمەکان. هێزە ئاسایشییەکان لەناو شاخەکاندا دەگەڕێن بە شوێن گومانبارەکانی ئەو هێرشەدا.

لە هەرێمی بەلوچستان، جوداییخوازانی هەرێمەکە یاخیبوون و سەرهەڵدانیشیان هەیەو زۆر جار کرێکارانی خەڵکی بەلوجستان نین، کوشتویانن، بەڵام هیچ ڕاپۆرتێک لە ئارادا نییە سەبارەت بەوەی جوداییخوازانی بەلوجستان هێرشیان کردبێتە سەر کەمایەتی شیعە ئاینزاکان.

XS
SM
MD
LG