فڕۆکە جەنگییەکانی ئیسرائیل ژمارەیەک ناوچەی کەرت غەززەیان بۆردومان کردووە پاش ئەوەی چەکدارە فەلەستینییەکان چەند موشەکێکیان گرتۆتە باشوری ئیسرائیل.
ئەو هێرشانەی زوویەکی ئەمڕۆ شەممەی ئیسرائیل، دامەزراوێکی دروستکردنی موشەک و نێوەندەکانی مەشق و ڕاهێنانی بزووتنەوەی حەماسییان کردبووە ئامانج، وەک لە ڕاگەیەندراوەکەی لەشکری ئیسرائیلدا ئاماژەی پێکراوە.
میدیای فەلەستینییەکان دەڵێن لە ئاکامی ئەو هێرشانە، پەنجەرەی باڵەخانە و خانوبەرەکان لە ڕۆژهەلاتی شاری غەززە شکاون، و هیچ ئاماژەیەکیان بە زیانی گیانی نەکردووە.
لەشکری ئیسرائیل دەڵێت، موشەکەکانی فەلەستینییەکان شاری عەسقەلانیان کردبووە ئامانج، بەڵام بەرگری ئاسمانی ڕێی گرتووە لەوەی موشەکەکان بتوانن بگەنە شارەکە و هەر لە ئاسماندا تەقێندراونەتەوە.
تا ئامادەکردنی ئەم هەواڵە هیچ لایەنێکی فەلەستینییەکان بەرپرسیارێتی خۆی لەو هێرشە موشەکیانە ڕانەگەیاندووە.
هێرشە موشەکییەکان و هێرشە ئاسمانییەکانی ئیسرائیلیش وەک کارێکی ئاساییە و بەردەوامیشن، هەرچەندە لەم چەند مانگەی ڕابردوودا بەهۆی بڵاوبوونەوەی پەتای کۆرۆناوە، ڕەوشەکە تا ئەندازەیەک هێور بوو لە هەردوو ناوچەدا.
بزووتنەوەی حەماس لە ساڵی 2007ەوە فەرمانڕەوای کەرتی غەززەیە و تا ئێستاش 3 شەڕی گەورەی کردووە لەگەڵ ئیسرائیلدا، بێ لەو وردە هێرشە بێشومارانەی دەیانکات. حەماس ئیسرائیل بەوە گوناهبار دەکات وابەستە نییە بە مەرجەکانی هێورکردنەوەی ڕەوشەکەوە، کە سوک کردنی گەمارۆ لەسەر کەرتی غەززە و ڕیگەپێدان بە دروستکردنی ژێرخانی ئابوری فرەلایەن و ڕەخساندنی زەمینەی دەرفەتی کار بەشێکن لەو مەرجانە.