Accessibility links

میرنشینە یەکگرتووەکانی عەرەب پێدانی ڤیزا بە ژمارەیەک وڵاتی موسڵمان قەدەغە دەکات


گەورە دیپلۆماتی میرنشینە یەکگرتووەکانی عەرەب بە ئاشکرایی داندەنێت بەوەی قەدەغە خراوەتە سەر هاوڵاتیانی پاکستانی لەوەی سەردانی میرنشینەکان بکەن و تا ئێستاش هیچ ڕاڤەیەک بۆ ئەم بڕیار و هەڵوێستە لە ئارادا نییە.

دەزگا و کۆمپانیاکانی گەشتوگوزاریش دەڵێن ئەم بڕیارە گەشتیاران و کارگوزارانی دەیان وڵاتی موسڵمانیش دەگرێتەوە لە نێوەندی بڵاوبوونەوەی پەتای کۆرۆنا و هەروەهاش ئاسییکردنەوەی پەیوەندییەکانی میرنشینە یەکگرتووەکانی عەرەب لەگەڵ ئیسرائیلدا.

دوابەدوای کۆبوونەوەکەی لەگەڵ هاوشانە پاکستانییەکەیدا، شێخ عەبدوڵا بن زاید ئال نەهیان جەختی کردۆتەوە لەوەی وەک دەڵێت " کۆتوبەندە ئاساییەکانی ئەم دواییە لەسەر پێدانی ڤیزا بەهۆی بڵاوبوونەوەی کۆڤید 19وەیە." وەک ئاژانسی فەرمی دەنگ و باسی میرنشینەکان بڵاویکردۆتەوە.
وەزیری دەرەوەی میرنشینەکان هیچ زانیاری و وردەکارییەکی زیاتری باس نەکردووە، لە کاتێکدا ئەم بڕیاری قەدەغەکردنی پێدانی ڤیزا توڕەیی و ناڕەزایی ئەوانەی لێکەوتۆتەوە کە دەیانەوێت بچنە ئەو 7 وڵاتەی میرنشینەکان پێکدەهێنن کە ژمارەی خەڵکی بیانی تیایدا زۆر زیاترە لە ژمارەی هاوڵاتیانی خۆی.

قەدەغەکردنی پێدانی ڤیزا وڵاتانی وەک لوبنان و کینیا و ئێران و سوریا و ئەفغانستان و یەمەن دەگرێتەوە و بڕیارەکەش هاوکاتە لەگەڵ دەستپێکردنی گەشتیاری بە پاسپۆرتی ئیسرائیلییەوە بۆ میرنشینە یەکگرتووەکانی عەرەب، پاش ڕێککەوتنی ئاساییکردنەوەی پەیوەندییەکانی نێوانیان.

XS
SM
MD
LG