تورکیا ناڕەزایی دەردەبڕێت لەسەر کوژرانی موحسن فەخریزادە، زانای ئەتۆمی ئێران و ئەو کردەی کوشتنەش بە کارێکی تێرۆریستی ناودێر دەکات و هەروەهاش دەڵێت "کوشتنی فەخریزادە دەبێتە مایەی لەق کردنی ئاشتی لە ناوچەکەدا."
لە ڕاگەیەندراوەکەی ئەمڕۆ یەکشەممەی وەزارەتی دەرەوەی تورکیادا هاتووە "کوژرانی موحسن فەخریزادە بەهۆی ئەو هێرشەی کرایە سەری، جێی مەخابنمانە و پرسە و سەرەخۆشی خۆمان دەگەیەنینە حکومەتی ئێران و کەسوکاری کۆچکردوو. تورکیا دژی هەر هەوڵێکە بۆ تێکدان و لەق کردنی ئاشتی ناوچەکە و دژی هەموو شێوازێکی تێرۆرە جا هەر کەسێک بیکات و ئامانجەکەش هەرچییەک بێت."
لەو ڕاگەیەندراوەی وەزارەتی دەرەوەی تورکیادا داواش لە هەموو لایەک کراوە پشودرێژی بپارێزرێت و ژیرانە سەروسەودا بکرێت لەم ڕەوشەدا.
وەزارەتی بەرگری ئێران ڕۆژی هەینی کوژرانی موحسن فەخریزادەی ڕاگەیاند پاش ئەو هێرشەی کرایە سەر ئۆتۆمبێلەکەی لە نزیک شاری تارانەوە.
ئێران ئیسرائیل و ئەمریکا گوناهبار دەکات بەوەی لە پشت کوژرانی فەخریزادەوەن.
تورکیا و ئێران دوو هێزی ناوچەکەن و پەیوەندییەکی مێژووی ئاڵۆز پێکیانەوە دەبەستێتەوە.
ئەم دوو وڵاتەی ڕۆژهەڵاتی ناوەڕاست لەسەر ژمارەیەک دۆسێ کێشە و ناکۆکییەکی زۆریان هەیە، بەڵام لەم چەند ساڵەی ڕابردوودا هاوکارییەکانی خۆیان لە ژمارەیەک بواردا زیاد کرد وەک بواری وزە.
تاران و ئانکەرە ڕێبازێکی هاوبەشیان هەیە بۆ دژایەتیکردنی شانشینی عەرەبستانی سعودیە و هەروەها میرنشینە یەکگرتووەکانی عەرەب.