حوکمەتی ئێران ئەمڕۆ هەینی بەفەرمی داوایکرد کە بەریتانیا ئەو کەشتی نەوت هەڵگرەی کە دەستی بەسەرداگرتوە دەست بەجێ ئازادبکات، ئەوەی لە گەروی جەبەل تارقدا دەستی بەسەردا گرتبوو ، هەروەها بەریتانیا تۆمەتبار دەکات بەوەی کە ئەو کارەی بە فرمانی وڵاتەیەکگرتوەکانی ئەمەریکا کردوە.
وەزارەتی دەرەوەی ئێران رایگەیاند و گوتی بەرپرسێکی باڵای وەزارەتی دەرەوەی ئێران لە میانەی کۆبونەوەیەکی لەگەڵ باڵوێزی بەریتانیا ، ئەوەی بۆ تاوتوێکردنی پرسەکە لەگەڵیدا بانگهێشت کرابوو گوتی؛ ئەم رەفتارەی بەریتانیای مایەی قبوڵکردن نییە و داواشی کرد کە دەستبەجێ بەریتانیا ئەو کەشتی نەوت هەڵگرە ئازاد بکات.
سکرتێری ئەنجومەنی دیاریکردنی بەرژەوەندیەکانی ئێران کە دەستەیەکی راوێژکارێکی و ناوبژیوانییە ئاگاهیدا و گوتی ؛ ئەگەر بەریتانیا ئەو کەشتی نەوت هەڵگرە بەرەڵا نەکات، ئەوا ئێران ناچار دەبێت هەڵوێستی هاوشیوە دژ بە کەشتیەکانی بەریتانی بگرێتە بەر.
هاوکات موحسن رەزایی ، سکرتێری ئەنجومەنی ئاماژەپێدراو گوتی ئێران لە مێژووی 40 ساڵی خۆیدا هەرگیز نەبوەتە سەرچاوەی هیچ گرژی و ئاڵۆزییەک ، گوتیشی بەڵام لەبەرامبەر سەرکێشی و کەڵەگایی ، هەرگیز لە وەڵامدانەوە سڵناکاتەوە و دوو دڵ نابێت.