Accessibility links

ئاراس شێخ جەنگی: ئەوانەی کە هەڵە سیاسیەکانیان کردووە دەبێت باجەکەیشی بدەن


ئاراس شێخ جەنگی

پێشتر ئاراس شیخ جەنگی کەسایەتی باڵای ناو یەکێتی نیشتمانی کوردستان پەیامێکی ئاڕاستەی پەرلەمانی هەرێمی کوردستانی عێراق کرد کە ئامادەیە تەواوی نهێنیەکانی ڕووداوەکانی 16 ی مانگی دە ئاشکرا بکات لە دانیشتنێکی کراوەی پەرلەماندا و هەروەهاش لە تەلەفزیۆنەکانەوە ڕاستەوخۆ پەخش بکرێت.

پەرلەمانی هەرێمی کوردستان ئەو داوایەی ڕەتکردەوە، وەک ئاراس شێخ جەنگی دەڵێت تەنانەت وەڵامەکەی پەرلەمان بە شێوەیەکی فەرمی نەبووە، بەڵام بیستویەتی بەڕێوبەری ئۆفیسی جێگری سەرۆکی پەرلەمان شتێکی لەسەر ئەو داوایەی بڵاوکردۆتەوە.

ئایا ئاراس شێخ جەنگی، دەیویست لە پەرلەماندا چ نهێنیەک ئاشکرا بکات؟

دەڵێت بەر لە باسکردنی ئەوەی ڕوویداوە پێویستە بگەڕێینەوە بۆ هۆکارەکانی هێنانە ئارای ئەو ڕەوشە کە بە هەڵەی سیاسی سەرکردایەتی سیاسی کورد (ڕیفراندۆم)ناودێری دەکات.

ئاراس شێخ جەنگی دەڵێت مەبەستی بووە بچێتە پەرلەمان چونکە سەرکردایەتی سیاسی کورد بەشێک لە یەکێتی نیشتمانییان تەخوین کرد و دەشڵێت تێناگات لەوەی ئایا خیانەت بەلای ئەوانەی ئەو تۆمەتانە دەبەخشنەوە دەبێت چی بێت وەک باسی دەکات ئەو بەشەی یەکێتی نەچوون لەشکری سەدام حوسەین بێنن و پەرلەمانی هەرێمی کوردستانی پێ داگیر بکەن، نەچوون میتی تورکی و تانکەکانی تورکیا تا هیران و نازەنین بێنن، یانیش دەستی لەشکری ئێران بگیرێت و بهێنرێتە سەر مەرزەکان.

لە درێژەی لێدوانەکەیدا بۆ دەنگی ئەمریکا، ئاراس شێخ جەنگی دەڵێت پێش 16 ی مانگی دە، جۆرێک لە ئاگربەست هەبوو بۆ 48 کاتژمێر، لە کاتی تەواو بوونی ئەو وادەیەدا ئەمیان ڕاسپاردووە تا 48 کاتژمێری تر ئەو ئاگربەستە درێژبکرێتەوە و دەشڵێت تەنها توانراوە 24 کاتژمێر ئەو شێوە ئاگربەستە درێژ بکاتەوە.

ئاراس شێخ جەنگی دەڵێت دەست هەبوون لەناو کەرکوک و ناوچەکانی دەوروبەریشیدا بۆ تێکدانی رێزەکانی یەکێتی نیشتمانی کوردستان، وەک دەڵێت پارتی دیموکراتی کوردستان دەیویست ئەو هێزەی یەکێتی لەو ناوچەیە تەفر و تونا بکات.

سەبارەت بە بەشداری هێزی پاسدارانی شۆڕشی ئیسلامی ئێران لەو ڕووداوانەدا، ئاراس شێخ جەنگی دەڵێت ئەو کاتە قاسمی سلێمانی سەرکردەی هێزی قودس لەوێ نەبووە و نازانێت ئەگەر لە بەغدا بووبێت و دەشڵێت نابێت ئەوە لەبیربکرێت کە قاسمی سلێمانی بە فەرمی ڕاوێژکارە لە حکومەتی عێراقدا و دەشڵێت چوار ساڵە قاسمی سلێمانی شەڕی دژی داعش دەکات لەگەڵ هێزی پێشمەرگەی کوردستاندا و یەکەم جاریش قاسم سلێمانی و ئەو 60 بۆ 70 کەسەی لەگەڵیدا بوون لە هەولێر بوون و کاک مەسعود خۆی سوپاسی کردوون.

ئاراس شێخ جەنگی ئاماژەش بەوە دەکات ئەوەی ئێستا لە هەرێمی کوردستان دەگوزەرێت و ئەو ناجێگیریە سیاسیەی لە هەرێمدا هەیە بەرەنجامی ڕیفراندۆمەکەی ڕۆژی 25 ی مانگی نۆیە و دەڵێت بەرەنجامی سیاسەتە هەڵەکانی دەسەڵاتی کوردییە کە چەندان ساڵە گوێیان لە کەس نەگرتووە و سیاسەتی ئابوری سەربەخۆیان ڕاگەیاند و لە کاتێکدا هەموو دنیا پێیان وتوون کێشەکانتان لەگەڵ بەغدا چارەسەر بکەن بەڵام نەیانکردووە و دەشلێت هەر بۆیە پێویستە هەموویان بدرێنە دادگا و خەڵک لە بری سوتاندنی شوێنەکان دەبێت داوای دادگایی کردنی ئەو دەسەڵاتە بکات چونکە ئەوانە هەڵەی گەورەیان کردووە.

لەسەر تەواوی ڕەوشی هەرێمی کوردستانیش ئاراس شێخ جەنگی نایشارێتەوە کە پێشبینی خراپی هەن بەڵام ناڵێت چین.

لەم وتووێژەیدا لەگەڵ بەڵێن ساڵح، ئاراس شێخ جەنگی باسیش لە ڕەوشی ناو یەکێتی نیشتمانی کوردستانیش دەکات و هەروەهاش چۆنیەتی ڕێکخستنەوەی پەیوەندییەکان لەگەڵ پارتی دیموکراتی کوردستاندا و جەختیش دەکاتەوە لەوەی پێویستە دەمووچاوەکانی ئەم دەسەڵاتە سیاسییەی هەرێم بگۆڕدرێن وەک هەنگاوێک بۆ چارەسەرکردنی ڕەوشی هەرێمی کوردستانی عێراق.

زانیاری زیاتر لە دەقی وتووێژەکەدایە:

please wait

No media source currently available

0:00 0:28:15 0:00

XS
SM
MD
LG