ئەمڕۆ بە هەزاران کەس لە ئیسپانیا لە گۆرەپانی سەرەکی لە شاری بەرسلۆنە یەک خولەک بە بێدەنگی راوەستان بۆ رێزلێنان لە قوربانیانی ئەو دوو هێرشە تیرۆرستیەی بە ئوتومبیل ئەنجامدران و تیایاندا بەلای کەم 14 کەس گیانیان لەدەستدا و پتر لە 100 کەسیش برینداربوون.
لە رێورەسمەکەدا پاشا و سەرۆک وەزیرانی ئیسپانیا بەشداریان کرد ، هاوکات سەرۆک وەزیران ماریانۆ رایۆی سێ رۆژ پرسەی نیشتمانی راگەیاند.
کارەساتەکە دوێنی لە شاری بەرسلۆنە دەستی پێکرد کاتێک ئوتومبیلێکی جۆری ڤان خۆی دەکات بە نێو رێبواراندا لە شەقامی لاس رامبلاس و 13 کەسیدەکوژێت و 100 کەسیش برینداردەکات.
وەزیری نێوخۆی ئیسپانیا گوتی ؛ شۆفێری ڤانەکە هەڵهاتوە و گەڕان بەدوایدا هیشتا هەر بەردەوامە ، گوتیشی هێزەکانی پۆلیسی ئیسپانی دوێنی دوو کەسیان دەستگیرکرد کە یەکێکیان بەرەچەڵەک مەغریبی یە و ئەوی تریان ئیسپانیە ، بەڵام دەست بەجێ ئاشکرا نەبوە کە ئایا ئەو دوو دەستگیرکراوە پەیوەندیان بە هێرشەکەوە چۆن بووە ، کەسی سێهەم ئەمڕۆ لە شارۆچکەی ریپۆل لە کەتەلۆنیا دەستگیر کراوە.
بەچەند کاتژمێرێک دواتر و لە هێرشێکی هاوشیوەدا لە ناوچەی کامبریلس کە هاوێنەهەوارێکە لە باشوری بەرسلۆنە، ئوتومبیلێک خۆی دەکات بە نێو خەلکانی پیادە و هەروەها بەرەو ئوتمبیلێکی پۆلیس دەچێت ، بەڵام پۆلیس لێیان دێنە دەست و هەموو 5 هێرشبەرەکە دەکوژن ، پۆلیس دەشڵیت هەموو کوژراوەکان بۆمبیان لە خۆیان بەستبوو. لەم رووداوەشدا 5 کەسی سیڤیل و پۆلیسێک بریندار بوون.