Accessibility links

فڕۆكەكانى هاوپەیمانان چاودێرى زیاتر دەخنە سەر جوڵەى داعش


فڕۆكەكانى هاوپەیمانان كۆبونەوە سەربازیەكانى داعش لەدەوروبەرى كەركوک دەكەنە ئامانج، ئەوەش لەكاتێكدایە جم و جۆڵى چەكدارانى ئەو ڕێكخراوە لەو ناوچەیە زیادیكردووە.

لیوا محەمەد قادر فەرماندەى میحوەرى داقوقى پێشمەرگە، بەدەنگى ئەمەریكاى ڕاگەیاند"داعشە گەڕاوەكانى موسڵ بۆ حەویجە وایكردوە جم و جۆڵەكانى داعش زۆر زیاد بكات."

وتیشى"فڕۆكەكان لەسەر خەتن و لەهەر جێگەیەك پێویست بكات كۆبونەوە سەربازیەكانى داعش دەكەنە ئامانج."

لەچەند ڕۆژى ڕابردودا فڕۆكەكانى هاوپەیمانان كۆبونەوەیەكى سەربازى داعشیان لەگوندى یەرغون ى باشورى كەركوک كردوەتە ئامانج، هەروەها ڕۆژى شەمەش 5 چەكدارى ترى قەناس بەدەستى ئەو ڕێكخراوەیان لە ڕۆژئاواى كەركوک بۆمب بارانكردوە، ئەمەش بەپێى زانیاریە هەواڵگیریەكانى پێشمەرگە.

هاوكات لەگەڵ بەردەوامى بۆمباران كردنیان لەلایەن هاوپەیمانانەوە، چەكدارانى داعش لەجم و جۆڵ نەوەستاون و چالاكیەكانیان لەدانانى بۆمبى چێنراودا چڕ كردوەتەوە، بەتایبەت لەچەند شەوى رابردودا لەمیحوەرى خورماتو دوو ئەفسەرى پێشمەرگە بەهۆى بۆمبەوە گیانیان لەدەستدا.

سەرلەبەیانى ئەمرۆش لەنزیك گوندى ئەلبومحەمەدى باشورى كەركوک بۆمب بە 5 پێشمەرگەدا تەقینەوە كەداعش لەنزیك خاڵێكى سەربازى دایاننابوو، بەو هۆیەوە پێشمەرگەیەك گیانى لەدەستداو 4 پێشمەرگەى تریش برینداربوون.

لیوا عەبدولرەحمان موسڵح فەرماندەى پێشمەرگە لەسنورى زەرگەى خورماتو، بەدەنگى ئەمەریكاى راگەیاند"جم و جۆڵى داعش بەو فراوانیە لە ناوچەكە هۆكارەكەى ئەوەیە دەزانن حەویجەشیان لەبن دەست دەردەهێنرێت، بۆیە دەیانەوێت لەحەمرین جێ‌ پێى خۆیان بەهێز بكەن."

فرۆكەكانى هاوپەیمانان لەدوو حاڵەت دا زیاتر هێزەكانى داعش بۆمب باران دەكەن، لەحاڵەتى كۆبونەوەى سەربازى و پیلانى ئەو رێكخراوە بۆ ئەنجامدانى هێرش، هەروەها لەحاڵەتى هێرش كردنە سەر خاڵە سەربازیەكانى پێشمەرگەدا.

XS
SM
MD
LG