Accessibility links

حەشدی شەعبی لە کەرکوک دژایەتی ڕیفرادۆمی هەرێمی کوردستان دەکات


حەشدى شەعبى لەشارى كەركوک بەبۆنەى ڕزگاركردنى شارى موسڵ و دەرهێنانى لەژێر دەستى داعش، ئاهەنگێكى ڕێكخست و تیایدا دژایەتى خۆیان بۆ ئەنجامدانى ڕیفراندۆم لەكەركوک نیشان دا و جەختیشیان لەسەر ئەوەكردەوە هێزەكانیان خاوەندارێتى كەركوكیش دەکەن.

مستەفا ئیمامى، جێگرى فەرماندەى گشتى میحوەرى باكورى هێزەكانى حەشدى شەعبى، بەدەنگى ئەمەریكاى ڕاگەیاند" ئامانجیان لە ئاهەنگەكە پیرۆزبایى كردن بووە لەو هێزانەى كە موسڵیان ڕزگاركرد، ئەگینا هیچ مەبەستێكى تریان نەبووە."

ئەنجامدانى ئاهەنگەكەى حەشدى شەعبى لەناو شارى كەركوک كە تێیدا كۆمەڵێك پەیامى سیاسیشیان ڕاگەیاند، لەلایەن بەشێك لەچاودێرانى سیاسیەوە بەوە لێكدەدرێتەوە كە پەیامێكە بۆ كورد بەوەى ئەوان دەست لەكەركوک هەڵناگرن.

بەڵام مستەفا ئیمامى ڕەتیكردەوە هیچ نیەتێكى ناتەندروستیان بەرامبەر بە كورد هەبێت، وتى" ئەمە یەكەم ئاهەنگمان نیە لەناو كەركوكدا، پێشتریش چەندین ئاهەنگى ترمان كردووە، ئینجا لەئاهەنگەكەدا ڕۆڵى پێشمەرگەشمان لەشەڕى داعش بەرز نرخاند."

بەپێى زانیاریەكان، حەشدى شەعبى پلانى هەیە بۆ دواى شەرى تەلەعفەر هێزەكانى بەرەو بەغدا نەكشێنێتەوە، بەڵكو بەشێكى ڕەوانەى دەوروبەرى شارى كەركوک بكات بۆ فشارخستنە سەر كورد و چەسپاندنى دەسەڵاتى حكومەتى عێراقى لەو پارێزگایە.

هەروەها بەرپرسانى ئاهەنگەكەى كەركوكى حەشدى شەعبى ئاراستەى قسەكردنیان وابوو كە شەڕی تریان لە پێشە، هەروەک پێشتریش لاهور شێخ جەنگى بەرپرسى ئاژانسى پاراستن و زانیارى ڕایگەیاندبوو كە دۆخێكى سەختتر لەپێشیانە.

لەوبارەیەوە جێگرى فەرماندەى گشتى میحوەرى باكورى حەشدى شەعبى ، دەڵێت"پێویستمان بە هێنانى هێزى زیاترى حەشدى شەعبى بۆ كەركوک نییە، بەڵكو خۆمان لەباشورى كەركوک هێزێكى زۆرمان جێگیركردووە."

سەبارەت بە وادەى دەستپێكردنى شەڕى حەویجە، ئیمامى ئاماژەى بەوەكرد، دەستپێكردنى ئۆپەراسیۆنى حەویجە پێویستى بەرێكەوتن و لێكتێگەیشتن لەگەڵ كورد هەیە، چونكە بەشێكى زۆرى ناوچەكە لەژێر كۆنترۆڵى پێشمەرگەدایە، وتى"لەگەڵ پێشمەرگە بۆ ئەو مەبەستە رێكدەكەوین."

جەختكردنەوەى فەرماندە باڵاكەى حەشدى شەعبى لەسەر رەوانە نەكردنى هێز بۆ دەوروبەرى كەركوك و رێكەوتن لەگەڵ پێشمەرگە، لەكاتێكدایە بەرپرسانى كورد دەڵێن زمانى بەرپرسانى باڵاى شیعى لە زمانى گفتوگۆ و دانوستانەوە بۆ زمانى هەڕەشە كردن گۆڕاوە.

XS
SM
MD
LG