بۆ یەکەم جارە نوێنەرانی سەرهەڵداوانی سوریا و نوێنەرانی حکومەتی ئەو وڵاتە بەشەڕ وێرانبووە ڕوو بە ڕوو لە پایتەختی کازاخستان کۆببنەوە وەک دەگوترێت بە مەبەستی تۆکمە کردنی ئەو ئاگربەستە لەرزۆکەی لە کۆتایی مانگی 12 ی ڕابردوودا مۆرکرابوو.
ڕوسیا و تورکیا و کۆماری ئیسلامی ئێران پشتیوانی لەم دانوستاندنانەی ئەستانە دەکەن.
لەگەڵ ئەوەشدا کە وڵاتە یەکگرتووەکانی ئەمریکا بانگهێشتی ئەم کۆبوونەوەیە کرا بەڵام واشنتۆن بەشداری نەکرد. ئەمریکا و فەڕەنسا و بەریتانیا و نوێنەرێکی یەکێتی ئەوروپا تەنها چاودێریی بەڕێوەچوونی ئەم دانوستاندنانە دەکەن.
میوانەکانی مێزگرد:
ئارێز ئەندەریاری، نوسەر و ڕۆژنامەوان
بورهان ڕەئوف، نوسەر و لێکۆڵەر
پێشتر چەندان کۆبوونەوەی تر کراون وەک ئەوەی ڤیەننا و ئەوانەی ژنێڤ و هیچیان ئەنجامێکی ئەوتۆیان نەبووە کە بگوترێت هۆکارێک بوون بۆ هێورکردنەوەی قەیرانی سوریا.
ئارێز ئەندەریاری:
*کۆبوونەوەی ئەستانە ناتوانێت ببێتە ڕێگر لەبەردەم ئەو بەهارە کوردیەی لە سوریا دەستیپێکردووە.
*ئەو کوردانەی بەشدارییان لە کۆبوونەوەکانی ئەستانە کردووە بە نوێنەرایەتی کورد بەشدارییان نەکردووە.
بورهان ڕەئوف:
*کەموکورتییەکانی ئاگربەستەکەی سوریایە خەڵک بێهیوا دەکات لە ئایندەی کۆبوونەوەکانی ئەستانە.
*کێشەکانی تورکیا وەها دەکەن نەتوانێت بۆ ماوەیەکی درێژتر پشتیوانی لە سەرهەڵداوانی سوریا بکات.
ئەم وتووێژانەی ئەستانە دەشێت وەک هەوڵێکی جودا سەیر بکرێن لەو ڕوانگەیەوەی مۆسکۆ و تاران کە پشتیوانی سەرەکی حکومەتی سوریان و تورکیاش کە بە پشتیوانکاری سەرهەڵداوان دادەنرێت ڕاستەوخۆ بەشدارن لە وتووێژەکاندا و کاریگەری ڕاستەوخۆشیان هەیە لەسەر ڕەوشی دانوستاندانەکان.
پەیەدە هێزەکانی سوریای دیموکرات بەشدارنین لەم کۆبوونەوانەی ئاستانەدا و بە فەرمیش ڕایانگەیاندوە کە وابەستەی هیچ بڕیار و ڕێککەوتنێکی ئاستانە نابن، بەڵام لە بەرامبەردا ئەنجومەنی نیشتمانی کوردی سوریا (ئەنەکەسە) کە بەشێکی هاوپەیمانێتی ئۆپزسیۆنی سوریایە بەشدارە لەم کۆبوونەوانەی ئاستانەدا.
زانیاری زیاتر لە دەقی مێزگردەکەدایە:
