Accessibility links

شەوى ڕابردوو لە ناوچەى نەفتخانەى سەربەقەزاى خانەقین ى پارێزگاى دیالە ، ئەبو كەرار خانەقینى فەرماندەى لیواى 110 ى حەشدى شەعبى كە كوردە كەوتوەتە بۆسەى ژمارەیەك چەكدارى داعشەوە و كوژراوە.

عەمید نەبیل محەمەد رێكخەرى پەیوەندیەكانى نێوان پێشمەرگە و حەشدى شەعبى ، بەدەنگى ئەمەریكاى ڕاگەیاند"ئەو چەكدارانەى داعش كە بۆسەیان بۆ حەشدى شەعبى داناوە ژمارەیان 30 چەكداربووە ، دوو ئۆتۆمبێل و حەوت ماتۆر سكیلیان پێبووە."

بەپێى وتەى رێكخەرى پەیوەندیەكانى نێوان پێشمەرگە و حەشدى شەعبى ، لەئەنجامى هێرشى چەكدارەكانى داعش دا ، ئەبوكەرار خانەقینى فەرماندەى لیواى 110 حەشدى شەعبى كەتەنها لیواى ئەو هێزەیە لەگەڵ شۆفێرەكەى و دوو پاسەوانیدا كوژراون.

وتیشى"كاتژمێر 1 ى شەو حەشد فرۆكەى هەستاندووە و هێزى بردووەتە ناوچەكە و تەرمەكەى لەبن دەستى داعش دەرهێناوە."

دەربارەى چۆنیەتى روداوەكە، عەمید نەبیل وتى"فەرماندەى لیوا كوردەكەى حەشد 5 ئۆتۆمبێل چەكدارى لەگەڵ بووە بەناوچەكەدا سوراونەتەوە ، چەكدارەكانى داعشیش ماتۆرسكیلێكیان ناردوەتە سەر رێگەكەى و ئەوان شوێنى كەوتوون، لەوكاتەدا كەوتونەتە بۆسەى داعشەوە."

دەنگى ئەمەریكا ئەمەریكا پەیوەندى بە ئەبو مونتەزر فەرماندەى فەوج لەلیوا كوردەكەى حەشدى شەعبى كرد، بەڵام موبایلەكەى بەردەست نەبوو.

لیواى 110 ى حەشدى شەعبى كە زۆربەى چەكدارەكانى كوردى فەیلى و كوردى خانەقینین ، بارەگاكەى لەشارۆچكەى سەعدیەى پارێزگاى دیالەیە ، دواى كوژرانى حەیدەر عەلى ئاغا ناسراو بە ئەبو كەرارى فەرماندەى لیواكە تەرمەكەى براوەتە بەغداو بریارە دواتر بهێنرێتەوە بۆ خانەقین و لەوێ‌ بەخاك بسپێردرێت.

XS
SM
MD
LG