دواى بڵاوبونەوەى هەواڵى كشاندنەوەى هێزەكانى پۆلیسى پاسەوانى سنور لەناوچە سنووریەكانى نێوان عێراق و ئێران ، فەرماندەیەكى پۆلیسى سنوور ئەو هەواڵە ڕەتدەكاتەوە و ئاماژەبەوە دەكات عێراق هێز لەناوچە سنووریەكان ناكێشێتەوە.
عەمید فەخرەدین عەبدوڵا فەرماندەى لیواى 3 ى پاسەوانى سنوورى سلێمانى ، لە لێدوانێكى تایبەتدا بۆ دەنگى ئەمەریكا ڕایگەیاند"هەفتەى پێشوو جێگرى وەزیرى ناوخۆى عێراق لەهەولێر لەگەڵ بەرپرسانى پۆلیسى سنووردا كۆبوەتەوە و هەواڵى چۆڵكردنى سنوور لەو كۆبونەوەیەوە دزەى پێكراوە."
فەرماندەى لیواى 3 ى پۆلیسى سنوورى سلێمانى ناوەرۆكى كۆبونەوەكەى ئاشكراكرد ، ئاماژەى بەوەكرد لەكۆبونەوەكەدا تەنها ئەوەندە وتراوە ، كە ناوچە سنوریەكانى نێوان عێراق و كۆمارى ئیسلامى ئێران بەراورد بە ناوچەكانى نێوان عێراق و سوریا و توركیا بێ كێشەیە.
عەمید فەخرەدین وتى"كەچى راگەیاندن ئەم قسەیەیان هەڵگێراوەتەوە ، ئەگینا پۆلیسى سنور واجبى خۆى هەیە و دەمێنێتەوە."
سێ لیواى سەربە پاسەوانى سنورى عێراق كە تایبەتن بەپاراستنى ناوچە سنوریەكانى نێوان عێراق و ئێران ، عێراق و توركیا لەهەرێمى كوردستان هەن ، كە ئەم لیوایانە هەرچەندە كوردن بەڵام سەربە وەزارەتى ناوخۆى عێراقن.
لەچەند رۆژى رابردوودا هەندێك میدیاى عەرەبى بڵاویانكردەوە ، حكومەتى عێراق پلانى بۆ كشاندنەوەى بەشێك لەو هێزانە و چۆڵكردنى ناوچە سنووریەكانى ئێران داناوە ، بەبیانوى ئارامى سنوورەكانى ئێران و گواستنەوەى ئەو هێزانە بۆ ناوچە سنوریەكانى نێوان عێراق وڵاتانى ترى وەكو توركیا و سوریا و كوەیت.
جەلال شێخ كەریم بریكارى وەزارەتى ناوخۆى هەرێمى كوردستان، بەدەنگى ئەمەریكاى راگەیاند"هەرچەندە لیواكانى پاسەوانى سنوور سەربە عێراقن ، بەڵام گەر پلانى كشاندنەوە لەناوچە سنوریەكانى ئێران بدرێت ئێمە لێى ئاگادار دەبین ، بەڵام بریارى لەو شێوەیە نەدراوە."
بەبرواى پسپۆرانى بوارى ئەمنى چۆڵكردنى ناوچە سنووریەكانى نێوان هەرێم و بەغدا لەرِووى ئەمنیەوە زیانى گەورە بە ئاسایشى هەرێمى كوردستان و عێراق دەگەیەنێت و لەمحاڵەتەدا بۆشایى ئەمنى دروست دەبێت.