حكومەتى عێراق بڕیارى خانەنیشین كردنى بەشێک لە ئەفسەرە باڵا كوردەكانى پۆلیسى پارێزگاى كەركوكى دەركردووە و بریارەكەى ڕەوانەى كەركوک كردووە ، نوێنەرانى كوردیش بە ئامانج كردنى پلەدارە كوردەكان لەلایەن وەزارەتى ناوخۆى عێراقەوە بە هێڵى سور ناودەبەن.
یەكێک لەپلەدارە باڵا كوردەكانى كەركوک كە داوایكرد ناوى بڵاونەكرێتەوە ، ناوى ئەو ئەفسەرە كوردانەى بۆ دەنگى ئەمەریكا ئاشكرا كرد كە حكومەتى عێراق دەیەوێت خانەنیشیان بكات و ، ڕایگەیاند"حكومەتى عێراق هەموو ئەو ئەفسەرە كوردانەى بەنوسراو خانەنیشین كردووە كە ئەفسەرى دیار و ڕۆڵدارى كەركوكن."
وتیشى"هەریەک لە عەمید سەرحەد قادر بەرێوەبەرى پۆلیسى قەزاوناحیەكان ، عەمید كاوە غەریب فەرماندەى پۆلیسى قەزاى داقوق ، عەمید محەمەد شێخ بزێنى و عەمید مەلا یادگار لەنێو ئەو لیستەدان كە وەزارەتى ناوخۆى عێراق خانەنیشینیان دەكات."
هاوكات ئازاد جەبارى سەرۆكى لیژنەى ئەمنى لەئەنجومەنى پارێزگاى كەركوک ، ئاماژەى بەوەكرد حكومەتى عێراق بەكۆمەڵ ئەفسەرانى كورد خانەنیشین دەكات و دووریان دەخاتەوە ، بەڵام هەرێمى كوردستان بێ هەڵوێستە.
لاى خۆشیەوە دكتۆر فەرهاد قادر ئەندامى پەرلەمانى عێراق ،بەدەنگى ئەمەریكاى ڕاگەیاند"بە ئامانج كردنى ئەفسەرە كوردەكانى ناوچە دابڕاوەكان هێڵى سورە و قابیلى قەبوڵ نیە."
وتیشى"ئەگەر مەسەلە تەمەنى یاسایى یە دەبێت ئەفسەرانى عەرەب و توركمانیش خانەنیشین بكرێن."
پێشتریش وەزارەتى ناوخۆى عێراق لیوا جەمال تاهیرى فەرماندەى گشتى پۆلیسى كەركوكى لەپۆستەكەى دوور خستەوە و ، عەمید خەتاب عومەرى لە جێگەكەى دانا.