چالاکوانانی ئۆپۆزسیۆنی سوریا دەڵێن لە میانەی شەڕو پێکدادان لەگەڵ هێزەکانی حکومەتدا داعش چەند گوندێکی لە حەلەب کۆنتڕۆڵ کردووە.
ڕێکخراوی چاودێری مافەکانی مرۆڤی سوریایی بنکە لە بەریتانیا ڕادەگەیەنێت شەڕەکە لە ڕۆژهەڵاتی شارۆچکەی خانناسر ڕوویدا کە لە چەند مانگی ڕابوردوودا چەندین جار لەلایەن داعشەوە گیراوەو جارێکی تر لەلایەن حکومەتەوە کۆنتڕۆڵ کراوەتەوە.
چالاکوانێک لە حەلەب دەڵێت داعش دواین هێرشی بۆ سەر ناوچەکە ڕۆژێک پێشتر دەستپێکرد و هەتا ڕۆژی شەممە نزیکەی 18 گوندی بچووکی گرت.
ئاژانسی دەنگوباسی ئەسۆشیەیتد دەڵێت ئەو چالاکوانە بە مەرجێک قسەی بۆیان کردووە کە ناوی ئاشکرا نەکرێت چونکە لەو دەترسێت داعش تۆڵەی لێ بکاتەوە.
خانناسر شوێنێکی ستراتیژییە چونکە لەسەر ئەو شاڕێیەیە کە ناوچەکانی حەلەبی ژێر دەسەڵاتی حکومەت بە تەواوی وڵاتەوە دەبەستێتەوە.