هێزى پێشمەرگە لێبوردنى گشتى بۆ ئەو چەكدارانەى داعش دەركرد كە دەیانەوێت ڕیزەكانى ئەو ڕێكخراوە بە جێبهێڵن و لە هیچ تاوانێكى كوشتن و بڕیندا تێوە نەگلاون.
وەستا ڕەسوڵ فەرماندەى میحوەرى باشورى كەركوكى هێزى پێشمەرگە، بە دەنگى ئەمەریكاى ڕاگەیاند"هەر چەكدارێكى داعش ئەگەر بیەوێت چەكەكەى دابنێت، دەتوانیت بگەڕێتەوە نێو ماڵ و منداڵى و هیچ لێپێچینەوەى لەگەڵ ناكرێت."
بەپێى زانیاریەكانى دەنگى ئەمەریكا، لێبوردنەكەى هێزى پێشمەرگە ئەو چەكدارانەى داعش ناگرێتەوە كە پێشتر و لە كاتى شەڕدا دەستگیركراون و لە ئێستادا لە گرتووخانەكانى هەرێمى كوردستان زیندانن.
بێستون فایەق ئەندامى پەرلەمانى كوردستان، لێبوردنەكە ئەو چەكدارانە دەگرێتەوە كە تاوانبار نین و هیچ كەس و لایەنێك سكاڵایان لەسەر تۆمار ناكات.
ژمارەیەكى زۆر چەكدارى كورد لە نێو ڕیزەكانى رێكخراوى داعشدان، بەڵام هەتا ئێستا روون نیـیە لێبوردنەكەى هێزى پێشمەرگە دەبێتە هۆى خۆ ڕادەستكردنەوەى ئەو چەكدارانە یان نا.