Accessibility links

سه‌رهه‌ڵداوانی سوریا به‌ره‌و به‌رزاییه‌کانی گۆلان پێشڕه‌وی ده‌که‌ن


بزاڤکارانی سوریا ده‌ڵێن سه‌رهه‌ڵداوان ئه‌مڕۆ چوارشه‌ممه‌ هێرشێکی چڕوپڕیان بۆ سه‌ر بنکه‌کانی حکومه‌ت له‌ نزیک به‌رزاییه‌ داگیرکراوه‌کانی گۆلان له‌ لایه‌ن ئیسرائیله‌وه‌ ئه‌نجامدا، دوابه‌دوای تۆپبارانکردنی ناو و ده‌ره‌وه‌ی دیمه‌شقی پایته‌خت که‌ بووه‌ مایه‌ی کوژرانی به‌لایه‌نی که‌م 33 که‌س.

سه‌رهه‌ڵداوانی هاوبه‌ندی به‌ره‌ی باشوور که‌ به‌ لەشکری حه‌ره‌موون ده‌ناسرێن چه‌ند ناوچه‌یه‌کیان له‌ گۆلان کرده‌ ئامانج، که‌ بریتیبوون له‌ شارۆچکه‌ و گونده‌کانی قونەیتەرە‌، خان ئه‌رنه‌به‌‌، به‌عس، جبه‌ و بنکه‌ی فیرقه‌ی 90 ی له‌شکری سوریا که‌ هێزێکی سه‌ره‌کی حکومه‌ته‌ له‌ ناوچەکەدا.

بزاڤکارێکی سوریا بنکه‌ له‌ باشوری وڵاته‌که‌ گوتی له‌ ئێستا‌دا شه‌ڕه‌که‌‌ له‌ناو شاری قونەیتەرەیە و لەشکری حه‌ره‌موون که‌ بریتین له‌ لقی ئه‌لقاعیده‌ له‌ سوریا و ئه‌حرار ئه‌لشام بۆردومانی ناوچه‌که‌ ده‌که‌ن هاوکاتی چه‌کدارانی به‌ره‌ی باشوور پێشڕه‌وی ده‌که‌ن.

جێی ئاماژه‌یە سه‌رهه‌ڵداوان ‌ماوه‌ی سێ مانگه‌ هێرشه‌کانیان له‌ باشوری سوریا ده‌ستپێکردووه‌‌ و ده‌ستیان به‌سه‌ر چه‌ند بنکه‌یه‌کی له‌شکری حکومه‌ت گوند و خاڵێكی په‌ڕینه‌وه‌ به‌ره‌و ئوردون گرتووه‌.

کۆمه‌ڵی سوریا بۆ چاودێری مافه‌کانی مرۆڤ بنکه‌ له‌ به‌ریتانیا ده‌ڵێن له‌ شه‌ڕه‌که‌ی ئه‌مڕۆ چوارشه‌ممه‌ سه‌ربازێک و سه‌رهه‌ڵداوێک تیایدا کوژراون، جگه‌ له‌ 6 سه‌رهه‌ڵداو که‌ دۆینێ کوژران.

XS
SM
MD
LG