به‌ره‌به‌یانی ئه‌مڕۆ پـێنجشه‌ممه توندوتیژیـیه‌کی گه‌وره له ناوچه‌ی ئه‌عزه‌میـیه‌ی به‌غدای پایته‌ختی عێراق که‌وته‌وه و له ئاکامدا 4 که‌س به زیندوویی سووتان و گیانیان له‌ده‌سـتدا و چه‌ندان که‌سی دیکه برینداربوون.
ئه‌فسه‌رێـک به پـله‌ی کۆلۆنێل(عه‌قید) به ئاژانسی ده‌نگ‌وباسی فڕانس پـرێسی گوتووه "ڕووداوه‌که له پاش کاژمێر 2 ی پـێش به‌ره‌به‌یان ده‌سـتیپێـکرد، کاتێـک خه‌ڵـکی شیعه به ڕێپـێوان به‌ره‌و مه‌زاری ئیمام موسا ئه‌لکازم ده‌چوون و به ناوچه‌ی ئه‌عزمیـیه‌ی زۆرینه سووننه‌دا تێپه‌ڕده‌بوون، ده‌نگۆیه‌ک له نێویاندا بڵاوکرایه‌وه گوایه خۆکوژێـک هه‌یه، ئه‌مه‌ش وایکرد خه‌ڵکه‌که بترسن و ڕاکه‌ڕاک و پاڵه‌په‌ستۆ له نێویاندا دروسـتبێت، پاشان هێزه‌کانی ئاسایش ده‌سـتیانکردبوو به ته‌قه‌کردن به مه‌به‌ستی کۆنترۆڵکردنی ڕه‌وشه‌که، به‌ڵام هاوکات له لایه‌ن دانیشـتوانی ئه‌عزه‌میـیه‌وه ته‌قه‌یان لێکرا و ئه‌مه‌ش وایکردووه تووشی حاڵه‌تێـکی ده‌مارگیری بـبن و کاردانه‌وه‌یان هه‌بێت."
هه‌روه‌ها له ئاکامی توندوتیژیـیه‌کان به‌ڕێوه‌به‌رایه‌تی سامان و وه‌به‌رهه‌مهێنان وه‌قفی سووننی و 17 ماڵ و چه‌ندان فرۆشگا و ئۆتۆمبیل له ئه‌عزه‌میـیه سووتێنران.
پـۆلیس گوتی 4 که‌س له نێو یه‌کێـک له ماڵه‌کانی ئاگریان تێبه‌ردرابوو به زیندوویی سووتاون و گیانیان له‌ده‌سـتداوه. هه‌روه‌ها ژماره‌یه‌ک که‌سیش به گولـله برینداربوون.
حه‌یده‌ر عه‌بادی سه‌رۆک وه‌زیری عێراق به‌یانی پـێـنجشه‌ممه سه‌ردانی ئه‌عزه‌میـیه‌ی کرد و ئۆباڵی ڕووداوه‌که‌ی خسته ئه‌ستۆی تێرۆرسـتان. پاشان فه‌رمانی به هێزه‌کانی ئاسایش کرد ڕێگه نه‌ده‌ن ئاژاوه‌که گه‌وره بـبێت، جه‌ختی له‌وه‌ش کرد حکومه‌ته‌که‌ی به توندی کاردانه‌وه‌ی ده‌بێت به‌رامبه‌ر هه‌ر که‌سێـک هه‌وڵی تێـکدانی سه‌قامگیری بدات.
له لایه‌کی دیکه‌وه محه‌مه‌د ئه‌لغه‌بان وه‌زیری ناوخۆی عێراق ڕایگه‌یاند ڕه‌وشی ناوچه‌ی ئه‌عزه‌میـیه له ئێسـتادا له ژێر کۆنترۆڵی هێزه‌کانی ئاسایشدایه و گومانبارانی ڕووداوه‌که ده‌سـتگیرکراون.
به‌پـێی سه‌رچاوه‌کان حکومه‌تی عێراق 75 هه‌زار پـۆلیس و ئاسایشی له جاده و شه‌قامه‌کانی به‌غدا داناوه بۆ پاراستنی ڕه‌وشی ئاسایش له کاتی ئه‌م مه‌راسیمه‌ی شیعه‌کاندا.