سوریا مه‌ترسی هه‌یه‌ سه‌رۆک ئۆباما له‌ ژێر فشاری کۆماریـیه‌کان بڕیاری لێدانی ڕژێمه‌که‌ی بدات

وه‌لید موعه‌لیم وه‌زیری ده‌ره‌وه‌ی سوریا ده‌ڵێت حکومه‌ته‌که‌ی مه‌ترسی هه‌یه‌ ئه‌مه‌ریکا له‌ ڕژێمه‌که‌ی بدات له‌ پاش ئه‌وه‌ی کۆماریـیه‌کان سه‌رکه‌وتنیان له‌ هه‌ڵبژاردنه‌کاندا به‌ده‌سـتهێناوه‌.

موعه‌لیم له‌ چاوپـێـکه‌وتنێـکدا له‌گه‌ڵ ڕۆژنامه‌ی "ئه‌لئه‌خبار" ی لوبنانی که‌ ڕۆژی پـێـنجشه‌ممه‌ بڵاوکرایه‌وه‌ گوتویه‌تی " هه‌تا ئێسـتا هێرشه‌کانی هاوپه‌یمان له‌ سوریا ته‌نها له‌ دژی داعش بوون‌ و سه‌رۆکی ئه‌مه‌ریکا براک ئۆباما له‌به‌ر هۆکاری ناوخۆی وڵاته‌که‌ی ده‌یه‌وێت خۆی لابدات له‌ شه‌ڕکردن له‌ دژی سوریا، به‌ڵام نازانین له‌ داهاتوو چی بڕیار ده‌دات له‌ کاتێـکدا‌ هه‌روا دێت و فشاری زیاتری ده‌خرێته‌سه‌ر، به‌ تایبه‌تی ئه‌گه‌ربێت و کۆماریـیه‌کان سه‌رکه‌وتن له‌ هه‌ڵبژاردنه‌کاندا به‌ده‌سـتبهێنن، بۆیه‌ ده‌بێت خۆمانی بۆ ئاماده‌بکه‌ین، وه‌ ئه‌وه‌مان بۆ ڕووسه‌کان ڕوونکردووه‌ته‌وه‌ و داوامان لێکردوون کاته‌که‌ بقۆزنه‌وه‌ و چه‌کی تایبه‌تمان بده‌نێ."

پاشان ڕۆژنامه‌که‌ لێی پـرسیوه‌ مه‌به‌ستت موشه‌کی S-300 ی دژی ئاسمانیـیه‌؟. ئه‌ویش له‌ وه‌ڵامدا گوتویه‌تی به‌ڵێ ئه‌و موشه‌که‌ و چه‌کی دیکه‌ی تایبه‌ت ئه‌وانه‌ی وه‌ها له‌ له‌شـکری سوریا ده‌که‌ن بتوانێت ڕووبه‌ڕووی کێشه‌کانی داهاتوو بـبێته‌وه‌.