ئوردن ده‌ست‌ده‌گرێت به‌سه‌ر بڕێـکی زۆری چه‌ک و ته‌قه‌مه‌نی له‌ نزیک سنووری سوریا

له‌شـکری ئوردن ده‌ڵێت هێزێـکی گه‌ڕۆکی له‌شکر له‌ نزیک سنووری سوریا ده‌سـتی گرتووه‌ به‌سه‌ر بڕێـکی زۆری چه‌ک و ته‌قه‌مه‌نی و جگه‌ره‌ و ماده‌ی هۆشبه‌ر که‌ له‌ سوریاوه‌ به‌ قاچاغی هێنرابوون.
له‌ به‌یانـنامه‌یه‌کدا که‌ ڕۆژی چوارشه‌ممه‌ له‌سه‌ر ماڵپه‌ڕی له‌شکری ئوردن بڵاوکرایه‌وه‌، نووسرابوو 5 قاچاغچیش ده‌سـتگیرکراون که‌ یه‌کێـکیان برینداربووه‌ کاتێـک له‌گه‌ڵ هێزه‌که‌دا به‌شه‌ڕ هاتبوون.
له‌شـکر هیچ زانیاریـیه‌کی له‌ باره‌ی ڕه‌گه‌زنامه‌ی قاچاغچیـیه‌کان نه‌دا.
چاودێران ده‌ڵێن زیادبوونی ڕووداوه‌کانی سه‌ر سنووری ئوردن ده‌گه‌ڕێته‌وه‌ بۆ ئه‌و نائارامییه‌ی سوریای گرتووه‌ته‌وه‌.