گوته‌بێژی کۆشـکی سپـی وه‌ڵامی لێدوانه‌که‌ی سه‌رۆکی ئێران ده‌داته‌وه‌

حه‌سه‌ن ڕوحانی سه‌رۆکی ئێران ده‌ڵێت زلهێزانی جیهان له‌ به‌رده‌م ئێراندا ملیان که‌چکرد، ئه‌مه‌ش ئاماژه‌یه‌که‌ بۆ ئه‌و ڕێکه‌وتنه‌ی شه‌ش زلهێزه‌که‌ی جیهان و ئێران له‌م دوایـیه‌دا له‌سه‌ر به‌رنامه‌ ناوکیـیه‌که‌ پـێی گه‌یشتن.
ڕۆژی سێشه‌ممه‌ له‌ شـاری ئه‌هوازی ئوسـتانی خوزستانی باشوری وڵاته‌که‌، ڕوحانی گوتی ڕێـکه‌وتنی ژنێڤ مانای ئه‌وه‌یه‌ جیهان دانی به‌ ئاشـتیخوازانه‌ی ته‌کنه‌لوژیای به‌رنامه‌ ناوکیـیه‌که‌ی ئێراندا هێناوه‌ و به‌مه‌ش ئه‌و گه‌مارۆیه‌ی به‌سه‌ر ئێراندا سه‌پێندراوه‌ ده‌شکێت.
گوتیشی ئه‌م سه‌رکه‌وتنه‌ به‌روبوومی ئه‌نجامی هه‌ڵبژاردنه‌کانی سه‌رۆکایه‌تی سـاڵی ڕابردووی وڵاته‌که‌یه‌‌.
به‌ڵام جه‌ی کارنی گوته‌بێژی کۆشـکی سـپی له‌ واشنتنی پایته‌خت به‌ په‌یامنێرانی گوت " گرنگ نیـیه‌ ئه‌وان چی ده‌ڵێن، ئه‌وه‌ی به‌ لای ئێمه‌وه‌ گرنگه‌ ڕێبه‌رانی ئێران چی ده‌که‌ن و ئێران چی ده‌کات بۆ پابه‌ندبوونی به‌ ڕێـکه‌وتنه‌که‌."