Accessibility links

چالاکوانانی سوریا ده‌ڵێن حکومه‌ت 61 ژنی ئازادکردووه‌


کۆمه‌ڵێـکی چالاکوانان ئه‌مڕۆ پـێـنجشه‌ممه‌ گوتی ده‌سه‌ڵاتدارانی سوریا 61 ژنیان ئازادکردووه‌ که‌ دوایـین بوون له‌ ئاڵۆگۆڕکردنی سێ لایه‌نه‌ی زیندانیاندا، ئه‌مه‌ش یه‌کێـکه‌ له‌ هه‌ره‌ سه‌رکه‌وتووترین سه‌وداکانی ئه‌نجامیان هه‌بووه‌ له‌ شه‌ڕی ناوخۆی سوریا، که‌وا هێشـتا لایه‌نه‌ به‌شه‌ڕهاتووه‌کانی هه‌رچی سه‌ودای ئاشـتیـیه‌ که‌ پـێشـنیارده‌کرێت ڕه‌تده‌که‌نه‌وه‌.
کۆمه‌ڵه‌ی چاودێری مافه‌کانی مرۆڤی سوریا بنکه‌ له‌ به‌ریتانیا ئه‌مڕۆ پـێـنجشه‌ممه‌ گوتی حکومه‌تی به‌شـار ئه‌سه‌د له‌ ماوه‌ی 2 ڕۆژی ڕابردوو ئه‌و ژنانه‌ی ئازادکردووه‌. هه‌تا ئاماده‌کردنی ئه‌م هه‌واڵه‌ کاربه‌ده‌سـتانی سوریا هیچیان له‌م باره‌یه‌وه‌ ڕانه‌گه‌یاندووه‌‌.
کۆمه‌ڵه‌که‌ ده‌ڵێت ئازادکردنی ئه‌م ژنانه‌ به‌شێـک بووه‌ له‌ ئاڵوگۆڕکردنێـکی ئاڵۆزی بارمته‌ و ده‌سـتگیرکراوان به‌ ناوبژیوانی قه‌ته‌ر و ده‌سه‌ڵاتدارێتی فه‌ڵه‌سـتینیـیه‌کان له‌ هه‌فته‌ی ڕابردوودا. هه‌روه‌ها ئازادکردنی 9 لوبنانی شیعه‌ ئاینزای لێـکه‌وته‌وه‌ که‌ له‌ لایه‌ن سه‌رهه‌ڵداوانی سوریاوه‌ ده‌سـتگیرکرابوون و له‌ به‌رامبه‌ریشـدا چه‌کدارانی لوبنانیش 2 فڕۆکه‌وانی تورکیان ئازادکرد.
کاربه‌ده‌سـتانی لوبنان گوتیان به‌شی سێـیه‌می سه‌وداکه‌ داوای له‌ حکومه‌تی سوریا ده‌کرد ژماره‌یه‌ک ژنیش ئازادبکات وه‌ک به‌شێـک له‌ داوای سه‌رهه‌ڵداوان.
به‌شـداریکردنی لوبنان و سوریا و تورکیا و قه‌ته‌ر و ده‌سه‌ڵاتدارێتی فه‌ڵه‌سـتینیـیه‌کان له‌ گه‌یشتن به‌ سه‌وداکه‌، نیشـانی ده‌دات که‌وا چۆن قه‌یرانی سوریا ناوچه‌که‌ی گرتووه‌ته‌وه‌.
جێی وه‌بیرهێنانه‌وه‌یه‌ له‌ مانگی سێی سـاڵی 2011 وه‌ قه‌یرانی سوریا ده‌سـتیپـێـکرد‌. له‌ سه‌ره‌تادا به‌ خۆپـیشـاندانی ئاشـتیانه‌ بوو له‌ دژی حکومه‌تی به‌شـار ئه‌سه‌د، به‌ڵام ورده‌ورده‌ به‌ره‌و یاخیبوون و شه‌ڕی ناوخۆ گوڕا. هه‌تا ئێسـتا زیاتر له‌ 100 هه‌زار که‌س له‌و نێوه‌دا گیانیان له‌ده‌سـتداوه‌ و 2 ملیۆن که‌سیش ئاواره‌ و ده‌ربه‌ده‌ربوون.
XS
SM
MD
LG