سه‌رۆکی نوێی ئێران ده‌ڵێت ئاماده‌یه‌ بۆ وتووێژ ڕاسته‌قینه‌ سه‌باره‌ت به‌ به‌رنامه‌ ناوکیـیه‌که‌ی وڵاته‌که‌ی

حه‌سه‌ن ڕوحانی سه‌رۆکی نوێی ئێران ده‌ڵێت ئاماده‌یه‌ له‌گه‌ڵ کۆمه‌ڵی نێوده‌وڵه‌تی وتووێژی ڕاسته‌قینه‌ بکات له‌ باره‌ی به‌رنامه‌ ناوکیـیه‌ مشـتومڕ له‌سه‌ره‌که‌ی وڵاته‌که‌یه‌وه‌.
ڕوحانی له‌ یه‌که‌م کۆنگره‌ی ڕۆژنامه‌وانی خۆیدا وه‌ک سه‌رۆکی ئێران ئه‌مه‌ی ڕاگه‌یاند و گوتی ئێران ئاماده‌یه‌ دانوسـتاندنی ڕژد له‌گه‌ڵ کۆمه‌ڵی 5+1 ئه‌نجام بدات به‌بێ ئه‌وه‌ی کات به‌ فیڕۆ بدرێت.
گوتیشی دروشمیان وتووێژ ده‌بێت نه‌ک هه‌ڕه‌شه‌کردن، ئه‌مه‌ش ئاماژه‌یه‌که‌ بۆ ڕۆژئاوا تاوه‌کو گوشـاری زیاتر نه‌خاته‌ سه‌ر ئێران له‌ به‌رامبه‌ر به‌رده‌وامبوونی له‌ به‌رنامه‌ ناوکیـیه‌که‌ی.
ڕۆژی دووشه‌ممه‌ جه‌ی کارنی گوته‌بێژی کۆشـکی سـپی گوتی ئه‌گه‌ر ئێران بیسه‌لمێنێت به‌رنامه‌ ناوکیـیه‌که‌ی بۆ کاری ئاشـتیخوازانه‌یه‌ ئه‌وا ده‌کرێت گۆشه‌گیریـیه‌که‌ی سه‌ری که‌م بکرێته‌وه‌.