چه‌کداران گه‌مارۆی وه‌زاره‌تی ده‌ره‌وه‌ی لیبیا ده‌ده‌ن

کاربه‌ده‌سـتێـکی له‌شـکری لیبیا ده‌ڵێت نزیکه‌ی 200 که‌سی چه‌کدار چوارده‌وری وه‌زاره‌تی ده‌ره‌وه‌یان داوه‌ و داوای چاکسـازی له‌ وه‌زاره‌ته‌که‌ ده‌که‌ن و هه‌روه‌ها داوای دامه‌زراندنی ئه‌و چه‌کدارانه‌ی پـێشوو ده‌که‌ن که‌ یارمه‌تیـیان دابوو له‌ ڕووخاندنی ڕژێمی دیکتاتۆری پـێشوو موعه‌ممه‌ر قه‌زافی.
کاربه‌ده‌سـته‌که‌ به‌ ئاژانسی ده‌نگ‌وباسی ئه‌سۆشیه‌تد پـرێسی گوت چه‌کداره‌کان به‌ 38 ماشێنه‌وه‌ که‌ ژماره‌یه‌کیان دۆشکه‌ی له‌سه‌ر بووه‌ ئه‌مڕۆ گه‌مارۆی وه‌زاره‌ته‌که‌یان دا و دیانگوت هێشـتا که‌سـانی سه‌ر به‌ ڕژێمی پـێشوو له‌ پـۆستی باڵادان له‌و وه‌زاره‌ته‌ و هه‌روه‌ها له‌ نوێنه‌رایه‌تیـیه‌ دیپـلۆماسیـیه‌کانی وڵاته‌که‌ش له‌ ده‌ره‌وه‌.
گوتیشی وتووێژ له‌گه‌ڵ چه‌کداره‌کاندا به‌رده‌وامه‌ و هه‌تا ئاماده‌کردنی ئه‌م هه‌واڵه‌ که‌س نه‌چووه‌ته‌ نێو وه‌زاره‌ته‌که‌وه‌.