Accessibility links

کاربه‌ده‌سـتانی ئه‌فغانسـتان و تالیبان له‌ فه‌ڕه‌نسا وتووێژ ده‌که‌ن


به‌رپرسانی ئه‌فغانی له‌گه‌ڵ تالیبان و گروپه‌کانی دیکه‌ی وڵات کۆده‌بنه‌وه‌ بۆ وتووێژکردن له‌سه‌ر ئاینده‌ی وڵات، له‌و ده‌مه‌ی هێزه‌کانی هاوپه‌یمانی ناتۆ له‌و وڵاته‌دا خۆیان بۆ کشانه‌وه‌ له‌ ساڵی 2014 ئاماده ‌ده‌که‌ن.
ئه‌وه‌ی جێی ئاماژه‌یه‌ فه‌ڕه‌نسا میوانداری ئه‌م کوبوونه‌وه‌ دوو رۆژیه‌ی نێوان به‌رپرسانی حکومه‌تی ئه‌فغانی و چه‌کدارانی تالیبان ده‌کات که‌ ئه‌مڕۆ له‌ نزیک شاری پاریسی پایته‌خته‌وه‌ ده‌ست پێده‌کات.
ئه‌مه‌ یه‌که‌مین جاره‌ به‌رپرسانی تالیبان و رابه‌رانی باڵای هاوپه‌یمانی ناتۆ و هه‌روه‌ها ئه‌نجومه‌نی باڵای ئاشتی ئه‌فغانی له‌مه‌ڕ ئاینده‌ی ئه‌فغانستان وتووێژی رووبه‌روو ئه‌نجام ده‌ده‌ن.
سه‌رۆکی ئه‌فغانی حامید کارزای له‌ ساڵی 2010 دا ئه‌نجومه‌نی ئاشتی دامه‌زراند وه‌ک هه‌وڵێک بۆ سازدانی دیالۆگ له‌گه‌ڵ میلیتانی تالیبان، ئه‌مه‌ش له‌ پێناو قایلکردنی چه‌کدارانی تالیبان بوو بۆ ئه‌وه‌ی کۆتایی به‌ شه‌ڕو توندوتیژی بهێنن و به‌شداری له‌ پرۆسه‌ی ئاشتبوونه‌وه‌ی سیاسی وڵاتدا بکه‌ن.
ئه‌وه‌ی جێی ئاماژه‌یه‌ له‌ کۆنفرانسێکی هه‌واڵی دوێنێدا، به‌ڕێز کارزای گوتی وڵاته‌که‌ی خواستی ئاشتی هه‌یه‌، بۆیه‌ پشتگیری ‌له‌ هه‌موو هه‌نگاونانێکی راسته‌قینه‌ ده‌کات که‌ له‌ پیناو ئاشتیدا بنرێت.
سازدانی ئه‌م کۆبوونه‌وه‌یه‌ی نێوان به‌رپرسانی تالیبان و گروپه‌کانی دیکه‌ و نێوان به‌رپرسانی ناتۆ له‌ دوای ئه‌وه‌ دێت که‌ فه‌ڕه‌نسا کۆتایی به‌ ئه‌رکی جه‌نگاوه‌ری له‌ ئه‌فغانستاندا دێنێت. دوێنێ فه‌ڕه‌نسا ئه‌و 500 سه‌ربازه‌ی خۆی که‌ له‌ ئه‌فغانستاندا مابوونه‌وه‌، سه‌رجه‌م ئه‌و پاشماوه‌یه‌شی پاشه‌کشێ پێکرد، ئه‌وانه‌ی له‌ پارێزگای باکوری خۆرهه‌ڵاتی کابولی پایته‌خت نیشته‌جێی کردبوون.
XS
SM
MD
LG