دوای هێرشە فراوانەکەی ئێران بۆ سەر ئیسرائیل، وتەبێژی حکومەتی هەرێمی کوردستان لە لێدوانێکدا بۆ دەنگی ئەمەریکا دڵنیایی دەدات لە ئارامی دۆخی هەرێمی کوردستان و ڕایدەگەیەنێت هەرێمی کوردستان لایەنگری ئاڵۆزییەکانی ناوچەکە ناکات.
پێشەوا هەورامی وتەبێژی حکومەتی هەرێمی کوردستان وتی، "هەرێمی کوردستان ئارامە و هیچ کێشەیەکی نییە."
سەبارەت بە هەڵوێستی حکومەتی هەرێم لەسەر ئاڵۆزییەکانی نێوان ئێران و ئیسرائیل، وتەبێژی حکومەتی هەرێمی کوردستان بە دەنگی ئەمەریکای گوت، "حکومەتی هەرێم هیچ کاتێک لایەنگری هیچ شەڕ و ئاڵۆزییەک نییە لە ناوچەکەدا. لەبەر ئەوەی هەرێمی کوردستان هەمیشە قوربانی شەڕ و ئەو ململانێیانە بووە کە لە ناوچەکەدا ڕوویان داوە، بۆیە ئێمە داوای ئاشتی دەکەین بۆ ڕۆژهەڵاتی ناوەڕاست نەک شەڕ و ململانێ."
شەوی ڕابردوو، 13ی مانگی چوار، ئێران لە ڕێگەی درۆن و مووشەکەوە هێرشی کردە سەر خاکی ئیسرائیل. هێرشەکە کاردانەوەی ئێران بوو بۆ هێرشێکی ئاسمانی ئیسرائیل بۆ سەر کونسوڵخانەی ئێران لە ڕۆژی 1-4-2024، لە دیمەشق کە بووە هۆی گیانلەدەستدانی بەلایەنی کەمەوە 7 کەس کە لە نێوانیان 3 فەرماندەی باڵای پاسداران هەن.
بە گوێرەی سەرچاوە هەواڵییەکان، هێرشەکە لە لایەن زیاتر لە 300 درۆن و مووشەکەوە ئەنجامدراوە و حکومەتی ئیسرائیل دەڵێت بەسەرکەوتوویی 99% هێرشەکەی تێکشکاندووە.
ڕەزا مەنوچەهری، ڕۆژنامەنووس و چاودێری کاروباری ئێران، بە دەنگی ئەمەریکای ڕاگەیاند، "شەڕی نێوان ئێران و ئیسڕائیل ململانێی ڕاستەقینەیە، بەڵام ئەم ململانێیە سەرناکێشێت بۆ شەڕێکی ڕاستەوخۆی دوورمەودا لە نێوان هەردوو وڵاتدا، چونکە سنوری هاوبەشی خاکی و ئاوی و ئاسمانیان نییە، هێرشەکانیان بە ڕێگەی درۆنەوە دەبێت یان گروپە چەکدارەکانی نزیکیان بۆ هێرشکردنە سەر یەکتر بەکار دەهێنن."
وتیشی، " بەشێک لە چاودێران کە وا لێکی دەدەنەوە گوایە ئەم دوو وڵاتە ناچنە شەڕێکی ڕاستەوخۆوە و دەبێت ڕێکەوتنی هاوبەش هەبێت لە نێوانیاندا، ئەمە بۆچونێکی موئامەرەیە، لە ڕاستیدا هۆکاری سەرەکی جیۆپۆڵەتیکی هەردوو وڵاتە."
شەوی ڕابردوو بە هۆی مەترسی فراوانبوونی شەڕ و ئاڵۆزی لە ناوچەکەدا، ئاسمانی بەشێک لە وڵاتانی عەرەبی بە ڕووی گەشتە ئاسمانیەکاندا داخران و داخستنەکەش عێراق و هەرێمی کوردستانیشی گرتەوە.
بەردەوامی هێرش و سنور بەزاندنەکانی ئێران و تورکیاش لەسەر هەرێمی کوردستان بە درێژایی چەند ساڵی ڕابردوو هەمیشە وا لێکدەدرێتەوە هەرێم لەبەردەم مەترسی بەردەوامی هێرشی دەرەکی و بە تایبەتیش ئیقلیمیدایە.
چاودێرانی لە ئەگەری هەر ئاڵۆزیەک لە ناوچەکەدا هۆشداری دەدەنە بەرپرسانی حکومەتی هەرێم بەوەی بە بێلایەنی و هاوسەنگی سیاسی هەرێم لە ململانێ نێودەوڵەتی و ئیقلیمیەکان بپارێزن.
ڕەزا مەنوچەهری لەمبارەوە دەڵێت، "زۆر گرنگە هەرێم سیاسەتی هاوسەنگ لە ناوچەکەدا پەیڕەو بکات و خۆی نەخاتە تەرازوی هیچ لایەنێکەوە، بۆ ئەوەی هەرێم پارێزراو بێت و نەبێتە گۆڕەپانی ئەو ململانێیانە. ئەگەر سیاسەتەکە هاوسەنگ بێت تاڕادەیەک ئەو مەترسیانەی لەسەر هەرێم هەن کەم دەبنەوە، ئەو هێرشانەش کە بە پاساوی جۆراوجۆر کراونەتە سەر هەرێم، هۆکارەکەی ئەوەیە سیادەی ناوچەکە و عێراق و هەرێمیش لە مەترسیدایە."
