Accessibility links

له پاش شه‌ڕی كه‌نداوی یه‌كه‌م و له 25 ی مانگی چواری ساڵی 1992 ‌به‌شی كوردی ده‌نگی ئه‌مه‌ریکا دامه‌زرا، ئه‌ویش به‌ هه‌وڵێكی زۆری چه‌ند که‌سـانێـکی دڵـسۆز.

له‌ سه‌ره‌تادا، به‌شی كوردی ته‌نها 5 كارمه‌ندی هه‌بوو و ماوه‌ی په‌خشی به‌رنامه‌کانی له‌سه‌ر ڕادیۆ ته‌نها 15 خوله‌ک بوو، به‌ڵام له‌ پاش دوو مانگ ژماره‌ی کارمه‌ندان بوو به‌ 9 و ماوه‌ی به‌رنامه‌کانیش بۆ 30 خوله‌ک زیادکران. له‌ مانگی یازده‌ی هه‌مان سـاڵ کارمه‌ندان بوون به‌ 11 و ماوه‌ی به‌رنامه‌کان بۆ یه‌ک کاژمێر زیادکران.

له‌ مانگی یه‌کی سـاڵی 2003 ، واته‌ به‌ر له‌ شه‌ڕی که‌نداوی دووه‌م و ڕزگارکردنی عێراق به‌ چه‌ند مانگێـک ماوه‌ی به‌رنامه‌کان بۆ 4 کاژمێر زیادکران و ژماره‌ی کارمه‌ندان بوو به‌ 22 و له‌ مانگی چواری هه‌ر هه‌مان سـاڵدا بوو 27 کارمه‌ند. پاش شەڕی داعش و زۆربوونی هەواڵەکانی ناوچەکە، لە ساڵی 2015 وە ژمارەی کارمەندان گەیشتە 31 و لەگەڵیدا پەیامنێرانی بەشی کوردیش زیادیانکرد کە ژمارەیان گەیشتووەتە 12 و بوونەتە سەرچاوەی هەواڵ نەک تەنیا بۆ بەشی کوردی بەڵکو بۆ تەواوی دەنگی ئەمەریکا کە بە زمان بەرنامەکانی پەخش دەکات.

له‌گه‌ڵ پـێشـکه‌وتنی ته‌کنه‌لۆجیا و کۆمپـیوته‌ر و بڵاوبوونه‌وه‌ی ئنته‌رنێت به‌ جیهاندا، به‌شی کوردی ده‌نگی ئه‌مه‌ریکا له‌ سـاڵی 2003 وه‌ ماڵپه‌ڕی خۆی کرده‌وه‌ به‌ هه‌ردوو زاراوه‌ و ڕۆژ له‌ دوای ڕۆژ ڕێگه‌ی نوێی ده‌گرێته‌به‌ر بۆ بڵاوکردنه‌ه‌ی بابه‌ته‌کانی و په‌یوه‌ندیکردن له‌گه‌ڵ جه‌ماوه‌ره‌که‌یدا، لەوانە فەیسبوک و یوتیوب و تویتەر.

له‌ بواری تەلەفیزیۆندا‌ له‌ 23 ی مانگی چواری سـاڵی 2012 ده‌سـتکرا به‌ په‌خشکردنی به‌رنامه‌کانی ڕادیۆ له‌ ڕێـگه‌ی ته‌له‌فیزیۆنه‌وه‌ تاوه‌کو زیاتر خه‌ڵـکی بە بەشی کوردی دەنگی ئەمەریکا ئاشـنا ببن. پاشان بەرەو بەرنامەی تەلەفیزیۆنی هەنگاو نرا.

لە ئێسـتادا هەفتانە دوو بەرنامەی 30 خولەکی تەلەفیزیۆنیمان هەیە کە ڕۆژانی سێشەممە و هەینی لە کەناڵی NRT پەخش دەکرێن.

هەروەها بەرنامەیەکی 30 خولەکی تەلەفیزیۆنیمان هەیە کە ڕۆژانی چوارشەممە لە کەناڵی Ozgur Gun پەخش دەکرێت.

XS
SM
MD
LG