نەتەوە یەکگرتووەکان ڕۆژی دووشەممە نیگەرانی خۆی دەربڕی دوای ئەوەی پەرلەمانی عێراق پڕۆژە یاسایەکی پەسەند کرد کە پەیوەندی هاوڕەگەزبازانی تێدا بە تاوان دەکرێت و ئەگەری سزای زیندانیکردنی بۆ 15 ساڵ هەیە.
ڕەڤینا شەمداسانی، وتەبێژی ئۆفیسی مافی مرۆڤی نەتەوە یەکگرتووەکان لە بەیاننامەیەکدا ڕایگەیاند، ئەم جۆرە یاسایانە "ڕەوایەتی دەدات بە جیاوازیکردن، خەڵک خستنە بەردەم تاوانی ڕق و کینە، خراپ بەکارهێنانی دەسەڵاتی پۆلیس، هەراسانکردن، تۆقاندن، هەڕەشەکردن و ئەشکەنجەدان".
پەرلەمانی عێراق ڕۆژی شەممە پڕۆژە یاسایەکی پەسەند کرد بۆ بە تاوانکردنی هاوڕەگەزخوازیی و سزای 10-15 ساڵ زیندانیکردنی بۆ دیاریکرد، ئەم هەنگاوەش لەلایەن گروپەکانی داکۆکیکاران لە مافەکانی مرۆڤەوە سەرکۆنە کرا و دەڵێن نوێترین هێرشە بۆ سەر کۆمەڵگەی هاوڕەگەزخوازان لە وڵاتەکەدا.
وەزارەتی دەرەوەی ئەمەریکاش هەر پاش پەسەندکردی پرۆژەکە ڕؤژی شەممە نیگەرانی خۆی دەربڕی و ڕایگەیاند " ئەم یاسایە هەڕەشەیە بۆ سەر ئەوانەی کە لە کۆمەڵگەی عێراقیدا لە مەترسیدان. دەکرێت بەکاربهێندرێت بۆ بەربەست دانان لەبەردەم ئازادی ڕادەربڕیندا و هەروەها بۆ ڕێگریکردن لە کارەکانی ڕێکخراوە ناحکومییەکان لە سەرانسەری عێراقدا."
پڕۆژە یاساکە سەرەتا سزای مەرگی بۆ هاوڕەگەزخوازیی و لەشفرۆشی دانابوو، بەڵام دوای ئەوەی وڵاتانی ئەوروپا و ئەمەریکا دژایەتی پڕۆژەکەیان کرد، پەرلەمانی عێراق پێش ئەوەی دەنگی لەسەر بدات پڕۆژە یاساکەی هەموار کردەوە.
.
سەرچاوە: فرانس پرێس
