لە نۆزدەهەمین ساڵیادی ڕووخانی ڕژێمی دیکتاتۆری عێراق،سەرۆکی ئێستای عێراق دەڵێت دوای دوو دەیە له ئه‌زموونی حوكمڕانی، وڵاتەکە به دۆخێكی هه‌ستیاردا تێده‌په‌ڕێت و گه‌یشتوەتە بنبه‌ستی سیاسی.
بەرهەم ساڵح لە بەیاننامەیەکدا کە لە تۆڕی تویتەردا بڵاویکردووەتەوە دەڵێت " 9 ی نیسان ساڵیادی كه‌وتنی ڕژێمی سته‌مكارییه له عێراق كه زۆرێک تاوانی دڕندانه‌ی دژ به خه‌ڵكی عێراق ئه‌نجامدا و تواناكانی مرۆیی و ماددی عێراقییه‌كانی له جه‌نگ و ململانێكاندا به‌فیڕۆدا، ئه‌م یاده ده‌رفه‌ت و بۆنه‌یه‌كی گونجاوه تاوەکو چاوێك به ئه‌زموونی سیاسی دوو دەیەیی رابردوودا بخشێنینه‌وه.
ناكرێت ئه‌و وه‌چه‌رخانه گه‌ورانه نادیده بگرین كه له دوای ساڵی 2003 وه هاتوونه‌تە ئاراوه، هاوكات پێویسته كه‌موكورتییه‌كانیشمان له‌به‌رچاو بێت و ناكرێت هه‌میشه پاساو بۆ شكسته‌كانمان بێنینه‌وه به‌وه‌ی به میرات له ڕژێمی پێشووەوە بۆمان ماونه‌‌ته‌وه."
هەروەها دەشڵێت "دوای دوو دەیە له ئه‌زموونی حوكمڕانی وڵاته‌كه‌مان به دۆخێكی هه‌ستیاردا تێده‌په‌ڕێت و گه‌یشتوینه بنبه‌ستی سیاسی و ئیستحقاقه ده‌ستورییه‌كان له ئانوساتی یاسایی خۆیاندا جێبه‌جێ نه‌كراون، دوای تێپه‌ڕبوونی زیاتر له 5 مانگ به‌سه‌ر هه‌ڵبژاردنه‌كاندا ئه‌م دۆخه قابیلی قبوڵكردن نییه، چونكه هه‌ڵبژاردنی پیشوه‌خته داواكاری شه‌قام بوو تاوه‌كو ببێته میكانیزمێكی چاكسازی و مسۆگه‌ركردنی سه‌قامگیری سیاسی و كۆمه‌ڵایه‌تی و راستكردنه‌وه‌ی هه‌ڵه‌كان و باشتركردنی گوزه‌رانی هاووڵاتییان و به‌ده‌نگه‌وه‌هاتنی داواكارییه ره‌واكانیان.
به‌رده‌وامی ئه‌م ته‌نگژه سیاسییه‌ی ئێستا سه‌رده‌كێشێت بۆ دۆخێكی مه‌ترسیداری ئه‌وتۆ كه هه‌موومان لێی زه‌ره‌رمه‌ند ده‌بین، بۆیه پێویسته سه‌رجه‌م هێزه سیاسییه‌كان رۆڵ و ئه‌ركی میژوویی و نیشتمانی و ئاكاری خۆیان بگێڕن له پته‌وكردنی یه‌كڕیزی نیشتمانی ئه‌مه‌ش به ده‌ستپێكردنی گفتوگۆییه‌كی جددی بۆ ده‌رچوون له‌و دۆخه چه‌قبه‌ستووه‌ی تێیكه‌وتوین، هه‌روه‌ها پێویسته په‌له بكه‌ین له پێكهینانی حكومه‌تێكی نیشتمانی به‌هێز و كارامه كه بتوانێت له سایه‌ی گۆڕانكارییه هه‌رێمی و نێوده‌وڵه‌تییه‌كاندا سه‌روه‌ری و سه‌ربه‌خۆی و به‌رژه‌وه‌ندییه‌كانی وڵات بپارێزێت و رووبه‌ڕووی ئاڵێنگارییه‌كان ببێته‌وه و به تایبه‌تیش دۆخی ناله‌باری ئابووری."
سەرۆک کۆماری عێراق لە بەیاننامەکەیدا جەخت لە گرنگی هەموارکردنەوەی دەستووری وڵاتەکەش دەکاتەوە و دەڵێت " ئه‌م چه‌ند مانگه‌ی دوای هه‌ڵبژاردن سه‌لماندی كه پێویستی زۆرمان به هه‌مواركردنه‌وه‌ی ده‌ستوور هه‌یه كه پێشتریش ئاماژه‌یان پێدابوو، ئه‌مه‌ش له‌سه‌ر بنه‌ما و سازانێكی نیشتمانی كه ده‌بێت به زووترین كات ده‌ستی پێبكه‌ین، ئه‌و به‌ندانه هه‌موار بكه‌ینه‌وه كه بوونه به‌ربه‌ست و هۆكاری گه‌یشتن به بنبه‌ستی سیاسی، گه‌نده‌ڵیش به‌ڵا و ئافاتێكی گه‌وره‌یه و هه‌ڕه‌شه له قه‌واره‌ی ده‌وڵه‌ت ده‌كات و پێویسته هه‌ڵوێسته‌یه‌كی جددی له‌باره‌وه بكه‌ین و به‌ره‌نگاری ببینه‌وه، كاربكه‌ین له پێناو دابینکردنی یه‌كسانی لە نێوان عێراقییه‌كان له ئه‌رك و مافدا، ئه‌مه‌ش پێویستی به پێداچوونه‌وەو ده‌ركردنی چه‌ند بڕیارێكی چاكسازی هه‌یه كه له راستگۆیی و ئیراده‌یه‌كی یه‌كگرتووی نیشتمانییه‌وه سه‌رچاوه ده‌گرێت."
سەرۆک وەزیرانی عێراق مستەفا کازمیش لە تویتێکدا یادی یەم ڕۆژە دەکاتەوە و دەڵێت "یادی شەهادەتی بیرمەندی چاکسازیخواز و خەباتکاری ڕێگای دادگەری؛ ئایەتوڵڵا محمد باقر الصدر دەکەینەوە. هاوتا بوونی ساڵیادی شاهەدەتیان لەگەڵ ڕۆژی کەوتنی ڕژێم لە 9ی نیسان، دەرفەتە بۆ جەختکردنەوە لە پێویستی پەیڕەوکردنی چاکسازی و دادگەری لە پرۆسەی سیاسیدا بۆ ئەوەی ئاواتەکانی گەل بێنە دی."
سەفین دزەیی بەرپرسی پەیوەندییەکانی دەرەوەیی هەرێمی کوردستانیش لە تویتێکدا ڕایگەیاند " 19 ساڵ پاش ڕووخانی پەیەکەری دیکتاتۆر سەدام حسێن لە مەیدانی فیردۆس. عێراقییەکان و خەڵکی کوردستان هیوایەکی زۆریان هەبوو بۆ گۆڕانکارییەکی بنچینەیی پاش دەیان ساڵی تاکڕەوییەتی، بەڵام زۆرێک لەم چاوەڕوانیانە نەهاتنەدی. دەبێت ئەو ئامانجانەمان لەبیربێت کە لە ڕۆژانی ئۆپۆزسیۆندا دانراون."
19 ساڵ لەمەوبەر لە 9 ی مانگی 4 ی ساڵی 2003 پاش ئەوەی هێزەکانی هاوپەیمانان بە سەرۆکایەتی ئەمەریکا چوونە ناو بەغداوە، ڕژێمە دیکتاتۆرەکەی سەدان حسێن ڕووخا و خەڵکی لە مەیدانی فیرۆدس پەیکەری سەدام حسێنیان ڕووخان، ئەم دیمەنەش بوو بە سیمبولی شەڕی عێراق.