Accessibility links

کاربه‌ده‌ستێکی ئۆکرانیایی ده‌ڵێت پێنج سه‌رباز کوژراون و 21 سه‌ربازی تریش بریندارن له‌ میانه‌ی ئه‌و پێکدادانانه‌ی له‌ 24 کاژمێری ڕابردوودا له‌ نێوان له‌شکری ئۆکرانیا و جوداییخوازانی سه‌ر به‌ ڕووسیا له‌ ڕۆژهه‌لاتی ولاته‌که‌ ڕوویانداوه‌.

هێزه‌ سه‌ربازیه‌کانی ئۆکرانیا له‌م هه‌فته‌یه‌دا پێشڕه‌وییه‌کی به‌رچاویان هه‌بووه‌ له‌ ناوچه‌کانی سه‌رهه‌ڵداواندا.

وه‌ک ئاژانسی ده‌نگ و باسی ئه‌سیۆشێتدپرێس ده‌ڵێت له‌وه‌تای ئه‌م قه‌یرانه‌ی ئۆکرانیا ده‌ستیپێکردووه‌ زیاتر له‌ 2000 که‌س کوژراون و له‌ سه‌روو 340 هه‌زار که‌سیش ناچاربوون زێدی خۆیان جێبهێڵن و ئاواره‌ بوون.

ئاندرێ لیشینکۆ، ده‌مڕاستی ئه‌نجومه‌نی ئاسایشی نیشتیمانی ئۆکرانیا ئه‌مڕۆ پێنجشه‌ممه‌ به‌ په‌یامنێرانی گوتووه‌ هێزه‌ سه‌ربازیه‌کانی حکومه‌تی وڵاته‌که‌ی هێشتاش له‌ شه‌ڕدان دژی جوداییخوازان له‌ شارۆچکه‌ی ئیلۆڤایسک و ناوچه‌کانی ده‌وروبه‌ریشیدا، واته‌ ئه‌و شارۆچکه‌یه‌ی له‌ نزیک شاری دۆنێتسکه‌وه‌یه‌ که‌ له‌ژێر کۆنترۆڵی سه‌رهه‌ڵداواندایه‌.

شه‌ڕی قورسیش له‌ شاری لوهانسک به‌رده‌وام بووه که‌ نزیکه‌ی 12 کیلۆمه‌تر له‌ سنوری ڕووسیاوه‌ دووره‌ و ئه‌م شاره‌ 19 ڕۆژه‌ گه‌مارۆ دراوه‌. ‌

هاوکات کاربه‌ده‌ستانی ئۆکرانیایی ده‌ڵێن پاسه‌وانه‌کانی سنور ده‌ستیان کردووه‌ به‌ پشکنینی ئه‌و کاروانی کۆمه‌که‌ی ڕووسیا که‌ چه‌ند ڕۆژێکه‌ له‌سه‌ر سنوری نێوان هه‌ردوو وڵات ڕاگیرابوو و چاوه‌ڕوانی وه‌رگرتنی ڕێگه‌پێدانیان ده‌کرد تا بچنه‌ ناو ئۆکرانیاوه‌.

کاربه‌ده‌ستانی سنور ده‌ڵێت ده‌ستیان کردووه‌ به‌ پشکنینی ژماره‌یه‌ک لۆری یان کامیون له‌سه‌رجه‌م ئه‌و 200 بارهه‌ڵگره‌ و هه‌روه‌هاش ده‌ستکراوه‌ به‌ پرۆسه‌ی ڕێگه‌پێدانیان تا بچنه‌ ناو خاکی ئۆکرانیاوه‌.

هاوکات ڕێکخراوی نێونه‌ته‌وه‌یی خاچی سوریش چه‌ند ڕۆژێکه‌ چاوه‌ڕوانی وه‌رگرتنی متمانه‌ی ئاسایشی‌ و پاراستنه‌ له‌ لایه‌نه‌کانی قه‌یرانی ئۆکرانیاوه‌ بۆ ئه‌م کاروانی کۆمه‌که‌ی ڕووسیا.

XS
SM
MD
LG