پـۆلیسی مالاوی گازی فرمێسک ڕژێنی به‌کارده‌هێنێت بۆ بڵاوه‌پـێـکردنی خۆپـیشـانده‌ران

پۆلیس له‌ مالاوی ده‌ڵێت گازی فرمێسک ڕژێنی به‌کارهێناوه‌ بۆ بڵاوه‌پێکردنی ئه‌و خۆپیشانده‌رانه‌ی داوای سه‌رله‌نوێ بژاردنه‌وه‌ی هه‌ڵبژاردنه‌که‌ی هه‌فته‌ی ڕابردووی سه‌رۆکایه‌تی وڵاته‌که‌ ده‌که‌ن.
خۆپیشانده‌ارن ئه‌مڕۆ هه‌ینی تایه‌یان سوتاندووه‌ و ژماره‌یه‌ک دوکانیشیان شکاندووه‌ له‌ پایته‌ختی وڵاته‌که‌.
ئه‌م خۆپیشاندانانه‌ش به‌ر له‌ بڕیاری دادگای باڵای وڵاته‌که‌ بووه‌ له‌سه‌ر ئه‌گه‌ر و نه‌گه‌ری ڕاگه‌یاندنی ئه‌نجامه‌ مشت و مڕ له‌سه‌ره‌که‌ی هه‌ڵبژاردنه‌که‌ ، یان بڕیاری سه‌ر له‌ نوێ ژماردنه‌وه‌ی ده‌نگه‌کان.
ئۆپزسیۆنی مالاوی نیگه‌رانی زۆری هه‌ن له‌وانه‌ دره‌نگ که‌وتنی کردنه‌وه‌ی بنکه‌کانی ده‌نگدان، ناڕیک و پێکی له‌ کارته‌کانی ده‌نگداندا.
ئه‌م هه‌ڵه‌ و که‌موکوڕیانه‌ش وه‌هایان کرد کۆمیسیۆنی هه‌ڵبژاردنی وڵاته‌که‌ ماوه‌ی ده‌نگدان بۆ ڕۆژێکی تر درێژ بکاته‌وه‌ و له‌ هه‌ندێک ناوچه‌ی وڵاته‌که‌ش بۆ ماوه‌ی 3 ڕۆژ.
جۆیس باندا سه‌رۆکی مالاوی ده‌ڵێت فێڵ و ته‌ڵه‌که‌ له‌ هه‌ڵبژاردندا کراوه‌.