Accessibility links

سەرۆکی ڕێکخراوی تەندروستی جیهانی ڕەتی دەکاتەوە پشتیوانی لە هەرێمی تیگرای ئیثیوپیای کردبێت


سەرۆکی ڕێکخراوی تەندروستی جیهانی تێدرۆس ئادهانۆم گیبریسوس

سەرۆکی ڕێکخراوی تەندروستی جیهانی تێدرۆس ئادهانۆم گیبریسوس تۆمەتەکانی وڵاتەکەی خۆی " ئیثیوپیا " ی ڕەت کردەوە کە گوایە پشتیوانی لە یاخیبووانی هەرێمی تیگرای کردبێت و داوای لە وڵاتانی دراوسێی ئیثیوپیا کردبێت چەک و یارمەتیەکانی دیکە بۆ هەرێمەکە دابین بکەن، لەکاتێکدا ماوەی دوو هەفتەیە شەڕ و پێکدادانەکان لە نێوان هێزەکانی حکومەتی ئیثیوپیا و یاخیبووانی هەرێمی تیگرایدا بەردەوامە.

تیدرۆس لە بەیاننامەیەکدا وتی " هەواڵ هەن لەسەر ئەوەی من لەم ڕەوشەدا بەرەیەکم هەڵبژاردووە پشتیوانی بکەم، ئەمە ڕاست نیە، دەمەوێت بڵێم من تەنها لە یەک بەرەدام و ئەوەش بەرەی ئاشتیە."

وتیشی " دڵم شکاوە بۆ نیشتیمانەکەم، ئیثیوپیا." هەروەها باسی لە بیرەوەرییەکانی منداڵی کرد کاتێک جەنگ هەبووە لە وڵاتەکەدا وخەڵکانێکی زۆر بەهۆی ئەو جەنگەوە کوژراون، هەروەها دەنگی خۆی خستە پاڵ دەنگی کۆمەڵگەی نێودەوڵەتی و داوای کرد بە زووترین کات شەڕ و پێکدادانەکان بوەستێنرێن.

لە ماوەی ڕابردوودا سەرکردەی سوپای ئیثیوپیا بورهان جولا بەبێ بەڵگە ئاماژەی بەوەدا سەرۆکی ڕێكخراوی تەندروستی جیهانی هانی وڵاتانی دراوسێی ئیثیوپیای داوە " سەرکۆنەی جەنگ بکەن و چەک بدەن بە ( بەرەی ڕزگاریخوازی گەلی تیگرای )."

سەرچاوە/ ئەسۆشیەتد پرێس

XS
SM
MD
LG