نوێنەری تایبەتی ئەمەریکا بۆ سوریا جەیمس جێفری وتی پێویستە شەڕ لە پارێزگای ئیدلبی سوریا بوەستێنرێت کە لەمدواییانەدا توندوتیژییەکان تیایدا زیادیان کردووە. وتیشی ئەمەریکا کاردەکات بۆ وەستاندنی شەڕ و پێکدادانەکان کە فشارێکی زۆریان خستۆتە سەر هاوڵاتیانی مەدەنی ناوچەکە.
جێفری کە نوێنەری تایبەتی هاوپەیمانێتی جیهانییە دژی ڕێکخراوی داعش لە دانیشتنێکی لیژنەی کاروباری دەرەوەی ئەنجومەنی نوێنەرانی ئەمەریکادا وتی " ئەوەی لە ئیدلب و سەرتاسەری وڵاتەکە پێویستمانە وەستاندنی شەڕە."
وتیشی " ئەم شەڕ و پێکدادانانە تەنها فشارەکانی سەر هاوڵاتیانی مەدەنی زیاتر دەکات و مەترسی هەڵگیرسانی جەنگ لەنێوان وڵاتاندا زیاتر دەکات." وتیشی " لەبەر ئەوە ئێمە هەوڵێکی زۆر دەدەین بۆ وەستاندنی ئەمە و بارودۆخەکە بۆ ڕێکەوتنی ئاگربەستەکە کە مانگی 9 واژۆمان کردووە."
هێرشەکانی ئەمدواییەی باکووری ڕۆژئاوای سوریا کە کۆتا شوێنی سەرەکی ئۆپۆزسیۆنە نزیکەی 180 هەزار کەسی ئاوارە کردووە. هەروەها هێرشە ئاسمانییەکانیش بوونە هۆکاری کوژرانی دەیان کەس، ئەمەش بەهۆی شەڕ و پێکدادانەکانی هێزەکانی سوریا و ئۆپۆزسیۆنەوە.
سەرچاوە/ ڕۆیتەرز