Accessibility links

نوێنەری ئەمەریکا سەردانی ئیسیوپیا دەکات


نوێنەری تایبەتی ئەمەریکا بۆ ئەفریقا جێفری فێڵتمان

وەزارەتی دەرەوەی ئەمەریکا ڕایگەیاند ڕۆژی پێنجشەممە نوێنەری تایبەتی ئەمەریکا بۆ ئەفریقا جێفری فێڵتمان گەشت دەکات بۆ ئیسیوپیا و سەردانەکەی دوو ڕۆژ دەخایەنێت. ئاماژەشی بەوەدا سەردانەکە بەهۆی نیگەرانیەکان لە زیادبوونی گرژییەکان لە باکووری هەرێمی تیگرایەوە سەرچاوەی گرتووە.

باڵیۆزخانەی ئەمەریکا لە ئادیس ئابابا لە ماوەی ڕابردوودا وتی " لەم چەند ڕۆژەی ڕابردوودا ڕەوشی ئاسایشی ئیسیوپیا بەشێوەیەکی بەرچاو تێکچووە، ئەوەش بەهۆی بەردەوامی شەڕ و پێکدادانەکان و خۆپیشاندانە مەدەنیەکان لە ئامهارا و ئافار و تیگرایەوە."

ڕۆژی سێشەممە حکومەتی فیدڕاڵی ئیسیوپیا باری نائاسایی لە سەرانسەری وڵاتەکەدا ڕاگەیاند.

ڕۆژی سێشەممە فێڵتمان لە واشنتن وتی زیاتر لە 900,000 هاوڵاتی لە تیگرای ڕووبەڕووی برسێتی بوونەتەوە، لەکاتێکدا لە سەدا 90 ی دانیشتوانەکەی پێویستیان بە یارمەتیە.

وتی " گەورەترین بەربەست لە گەیاندنی خواردن و دەرمان و یارمەتیە پێویستەکانی دیکە حکومەتی فیدڕاڵە "،کە مانگی ڕابردوو حەوت کارمەندی مرۆیی نەتەوە یەکگرتووەکان و بەرپرسانی مافەکانی مرۆڤی لە وڵاتەکە دەرکرد.

هەروەها ئاماژەی بەوەدا شەڕ و پێکدادانەکانی نێوان هێزەکانی حکومەت و بەرەی ئازادی گەلی تیگرای تەنها ڕەوشی وڵاتەکە خراپتر دەکات، وتی " شەڕی ناوخۆ لە ئیسیوپیا وێرانکەر دەبێت بۆ داهاتووی وڵاتەکە و خەڵکەکەی، داوا لە حکومەتی ئیسیوپیا و بەرەی ئازادی گەلی تیگرای و لایەنەکانی دیکە دەکەین دەرفەتێک بدەن بە ئاشتی."

فێڵتمان ڕەتیشی کردەوە ئەمەریکا زیاتر پشتیوانی لە بەرەی ئازادی گەلی تیگرای بکات و وتی " ئەمە ڕاست نیە." وتیشی بەڕێوبەرایەتیەکەی بایدن بەردەوام سەرکۆنەی فراوانکردنی جەنگی کردووە لەلایەن هێزەکانی تیگرایەوە، بەتایبەتی ئەو هەواڵانەی کە گوایە هێزەکانی تیگرای بەرەو ئادیس ئابابا دەجوڵێن.

وتی " بەڕوونی پێتان دەڵێم، دژایەتی هەر جوڵەیەکی بەرەی ئازادی گەلی تیگرای دەکەین بەرەو ئادیس یاخود هەر هەوڵێکی بەرەکە بۆ گەمارۆدانی ئادیس. ئەمە پەیامی ئێمەیە."

سەرچاوە/ دەنگی ئەمەریکا

XS
SM
MD
LG