سەرۆکی بەڕێوبەرایەتی پۆلیسی شارۆچکەی مارشاڵ لە ویلایەتی ئارکانساسی ئەمەریکا لانگ هۆڵاند دەڵێت مەترسی هەڕەشەکانی ڤایرۆسی کۆرۆنا زیاد لە قەبارەی خۆی گەورە کراوە. دەشڵێت تەنها لە شوێنێکدا ئەگەر پێویست بکات دەمامک دەبەستێت. هەروەها ئەفسەرەکانیشی ناچار ناکات دەمامک ببەستن.
ڕۆژێک دوای ئەوەی فەرمانڕەوای ویلایەتی ئارکانساس ئاسا هەچینسن فەرمانێکی واژۆ کرد بۆ بەکارهێنانی دەمامک لە سەرتاسەری ئارکانساسدا، هۆڵاند ئەوەی خستەڕوو بەڕێوبەرایەتیەکەی بەکارهێنانی دەمامک بەسەر شارۆچکەی ئۆزارکسدا ناسەپێنێت، وتیشی فەرمانەکە هەنگاوێکی نادەستوورییە.
هۆڵاند وتی " ئەوەی من دەمەوێت بیڵێم ئەوەیە ئەگەر دەتەوێت دەمامک ببەستیت ئەوا مافی خۆتە. ناکرێت ئەوە بسەپێندرێت بەسەر خەڵکدا."
هۆڵاند یەکێکە لە کۆمەڵێک لەو سەرۆک پۆلیسانەی ئارکانساس و ناوچەکانی دیکەی ئەمەریکا کە دەڵێن بەکارهێنانی دەمامک بەسەر ناوچەکانیاندا ناسەپێنن و فەرمانەکە ڕەت دەکەنەوە.
سەرچاوە/ ئەسۆشیەتد پرێس