Accessibility links

ئەمەریکا هێرشی ئاسمانی نوێ دەکاتە سەر جوڵانەوەی شەباب لە سۆماڵ


ئەمەریکا ڕایگەیاند دوو هێرشی ئاسمانی کردۆتە سەر شارەزایانی بواری تەقەمەنی لە جوڵانەوەی شەبابی جیهادی سەر بە ڕێکخراوی قاعیدەدا، ئەمەش پێش کشانەوەی زۆرینەی هێزەکانی ئەمەریکا لە سۆماڵ.

سەرکردایەتی ئەمەریکا بۆ ئەفریقا" ئافریکۆم " لە بەیاننامەیەکدا وتی " دوو هێرشی ئاسمانی دژی شارەزایانی بواری تەقەمەنی جوڵانەوەی شەباب لە جیلیبی سۆماڵ ئەنجام دراون." ڕوونیشی کردەوە " هەڵسەنگاندنە سەرەتاییەکان ئاماژە بەوە دەدەن هێرشەکان کۆمەڵێک تیرۆریستی ناسراوییان کوشتووە کە ڕۆڵی گرنگیان هەبووە لە دروستکردنی تەقەمەنی بۆ جوڵانەوەی شەباب."

فەرماندەی سەرکردایەتی ئەمەریکا لە ئەفریقا جەنەڕاڵ ستیڤن تاوسند وتی " بەردەوام دەبین لە فشارەکانمان بۆ سەر تۆڕی جوڵانەوەی شەباب، ئەوان بەردەوامن لە لەناوبردنی ئاسایشی سۆماڵ، دەبێت کۆنتڕۆڵ بکرێن."

سوپای ئەمەریکا جەختیشی لەوە کردەوە " سەرەڕای بەردەوامبوونی هەڵسەنگاندنە سەرەتاییەکان بۆ کاریگەرییەکانی هێرشەکە، دەرکەوتووە هیچ هاوڵاتیەکی مەدەنی بەهۆی هێرشەکەوە زیانیان بەرنەکەوتووە."

سەرچاوە/ فرانس پرێس

XS
SM
MD
LG