سکرتێری گشتی نەتەوە یەکگرتووەکان ئەنتۆنیۆ گۆتێرێش دیبلۆماتکاری فەڕەنسی ژان ئارنۆی وەکو نوێنەری تایبەتی خۆی بۆ ئەفغانستان و ناوچەکانی دەوروبەری دیاریکرد، ئەمەش پێش دەستپێکردنی دانوستانەکانی ئاشتی ئەفغانستان کە لەم هەفتەیەدا لە مۆسکۆ بەڕێوەدەچێت.
ئارنۆ بە هەماهەنگی لەگەڵ نوێنەری تایبەتی نەتەوە یەکگرتووەکان بۆ ئەفغانستان و سەرۆکی شاندی نەتەوە یەکگرتووەکان بۆ یارمەتیدانی ئەفغانستان ( یۆناما ) دیبۆرا لیۆنزدا کاردەکات.
وتەبێژی نەتەوە یەکگرتووەکان ستیڤان دوجاریک وتی سکرتێری گشتی داوای لە دیبلۆماتکارە فەڕەنسیەکە کردووە " یارمەتی بدات لە گەیشتن بە چارەسەرێکی سیاسیی بۆ ململانێکانی ئەفغانستان." پێشتر ئارنۆ وەکو نوێنەری نەتەوە یەکگرتووەکان کاریکردووە بۆ پڕۆسەی ئاشتی لە کۆڵۆمبیا و شارەزایی هەیە لە کاروباری ئەفغانستاندا.
وتیشی " دیاریکردنی ڕەنگدانەوەی پابەندبوونی بەردەوامی نەتەوە یەکگرتووەکانە بە چارەسەرێکی ئاشتیانە بۆ ململانێکان."
ڕاگەیاندنەکەی نەتەوە یەکگرتووەکان ماوەیەکی کەم پێش دەستپێکردنی دانوستانەکانی ئاشتی نێوان حکومەتی ئەفغانستان و تاڵیبان دێت لە مۆسکۆ، بە ئامادەبوونی نوێنەرانی هەریەک لە وڵاتانی ئەمەریکا و پاکستان و چین.
سەرچاوە/ فرانس پرێس