ئۆفیسی وەزیری دەرەوەی بەڕیتانیا بۆریس جۆنسن لە بەیاننامەیەکدا ڕایگەیاند وەزیری دەرەوەی بەڕیتانیا بە هاوتا فەڵەستینیەکەی ڕیاز مالیکی ڕاگەیاندووە کە قودس دەبێت پایتەختێکی هاوبەش بێت بۆ ئیسڕائیل و دەوڵەتی فەڵەستین.
وتیشی " پابەندبوونی بەڕیتانیا لە پشتیوانیکردنی گەلی فەڵەستین و چارەسەری دوو دەوڵەتی و پێویستی دەستپێکردنەوەی دانوستانەکانی ئاشتی دووپات دەکەمەوە و هەروەها دووپاتی دەکەمەوە کە هەڵوێستی بەڕیتانیا سەبارەت بە پێگەی قودس ڕوونە و بەردەوام دەبێت."
هەروەها لە بەیاننامەکەدا هاتووە دەڵێت " پێگەی قودس دەبێت لەڕێی دانوستانەکانی نێوان فەڵەستینیەکان و ئیسڕائیلییەکانەوە یەکلایی بکرێتەوە و لەکۆتاییدا دەبێت قودس پایتەختی هاوبەشی ئیسڕائیل و دەوڵەتی فەڵەستین بێت."
سەرچاوە/ ڕۆیتەرز