هاوار هەركی، سەرپەرشتیاری ئۆفیسی هەولێری تۆری رێکخراوە مەدەنیەكانی سۆران، لەبارەی ئەو شەڕ و ئاڵۆزیانەی دەڤەرەكە و ژیانی گوندنشینانی ناوچە سنووریەكان بە دەنگی ئەمەریكا دەڵێت:
"ئەو خەڵكە زور بە سەختی ژیان دەكەن ناكرێت گوندەكانیان جێبهێڵن و بێنە ناو سۆران؛ ئەوان شوێن و ڕێگایان هەمووی لەو ناوچانەیە لە ژیانیكی زورسەخت و ناخۆشدان."
ناوبراو دەڵێت ئه‌وان " وەكو رێكخراوە مەدەنیەكان و رێكخراوەكانی مافی مرۆڤ و چاڵاكوانان ئامادەن پڕۆژە یاسایەك بنووسنەوە بەڵام بە مەرجێك بیدەن بە سەرجەم فڕاكسیۆنە جیاوازەكانی نێو پەرلەمان كە كاری جدی لەسەر بكرێت بۆ ئەو گوند نشینانەی لای سیدەكان و چومان و باڵەكایەتی و ئەو ناوچانە تا كاری باشیان بۆ بكرێت بۆ ئەوەی چیتر لە لایەن دراوسێكانمانەوە بە توپبارانكردن ئەو خەڵكە سڤیلە نەكرێتە ئارمانج."
لەبارەی شەڕ و ئاڵۆزیە بەردەوامەكانی ناوچە جیاجیاكانی هەرێمی كوردستان لە نێوان پەكەكە و توركیا ، دكتۆرە ڤالا فەرین سەرۆكی پەرلەمانی كوردستان بەناوی گشت ئه‌ندامانی پەرلەمانی كوردستانەوە لە دانیشتنێكی پەرلەماندا ئیدانەی توپبارانكردنی ناوچە سنووریەكانی هەرێمی كوردستان دەكات و ئیدانەی كۆشتن و برینداركردنی خەڵكی سڤیل دەكات و داوا لە گشت دامەزراوە دەستوریەكانی عێراقی فیدرال دەكات که بە پێی دەستوری كۆماری عێراقی فیدرالی ساڵی 2005 پارێزگاریكردن و پاراستنی ناوچە سنووریەكان دەخرێتە ئەستۆی ئەوان كە بە ئەركی خویان هەڵبستن لە پارێزگاریكردنی ناوچە سنووریەكان و لە پاراستنی خەڵكی سڤیل و هەروەها لە قەرەبوكردنەوەی ئەو زەرەر و زیانانەی كە بەر بە خەڵكی سڤیل دەكەوێت لەو ناوچانە.
شایەنی باسە ڕەز و باغ و زەویەكانی چەندین گوندی ناوچە سنووریەكانی هەرێمی كوردستان ساڵانە بەهۆی ئەو شەڕ و ئاڵۆزیانەی ناوچەكەوە دەسوتێن و خەڵكەكە ڕووبەڕووی زیانی زوری مادی و گیانی دەبنەوە .
