لە کۆمەڵێک ڕاپۆرتدا هاتووە دەڵێن سەرۆک ترامپ داوای لە بەڕێوبەری پێشووی دەزگای لێکۆڵینەوەی فیدڕاڵی جەیمس کۆمی کردووە لێکۆڵینەوەکان سەبارەت بە پەیوەندییەکانی ڕاوێژکاری ئاسایشی نیشتیمانی پێشوو مایکڵ فلین لەگەڵ ڕوسیادا دابخات، بەڵام کۆشکی سپی وتی ئەو چیرۆکانە راست نین.
ڕاپۆرتەکان دەڵێن سەرۆک ترامپ لەمیانەی کۆبوونەوەیەکدا لە مانگی دوودا ئەو داوایەی لە کۆمی کردووە بەپێی نوسراوێک کە کۆمی دوای کۆبوونەوەکە نوسیویەتی و سەرۆک وتویەتی " هیوادارم بتوانیت واز لەمە بهێنیت." ئەوەش ئاماژە بووە بۆ دۆسییەکەی فلین.
وردەکارییەکانی نوسراوەکەی کۆمی سەرەتا لەلایەن نیویۆرک تایمزەوە بڵاوکرایەوە و دواتر لەلایەن واشتن پۆست و چەند ڕۆژنامەیەکی ترەوە دڵنیایی لەسەر درایەوە.
سەرچاوە/ VOA