گەورەی پارێزەرانی سەرۆکی ئەمەریکا دانۆڵد ترامپ لە لێکۆڵینەوەکاندا سەبارەت بە دەست وەردانەکەی ڕوسیا لە هەڵبژاردنەکانی ئەمەریکادا دەست لەکارکێشانەوەی خۆی پێشکەش کردووە.
جۆن دۆدی پارێزەر لە واشنتن وتی " سەرۆکم خۆشدەوێت و هیوای باشی بۆ دەخوازم."
ڕۆژنامەی نیویۆرک تایمز یەکەم ڕۆژنامەبوو هەواڵی دەست لەکارکێشانەوەکەی پارێزەرەکەی سەرۆک ترامپی بڵاوکردەوە و سەرچاوەیەکیش وتوویەتی سەرۆک هەمیشە ئامۆژگارییەکانی دۆدی پشت گوێ خستووە.
دۆد هۆکاری دەست لەکارکێشانەوەکەی ڕوون نەکردەوە.
جەی سکالۆ پارێزەرێکی دیکەی سەرۆک ترامپە و لە بەیاننامەیەکدا وتی " دۆد هاوڕێم بووە ئەندامێکی گرنگ بووە لە تیمە یاساییەکەماندا."
ڕۆژی شەممە دۆد داوای کرد لێکۆڵینەوەکان سەبارەت بە دەستوەردانەکەی ڕوسیا لە هەڵبژاردنەکانی ئەمەریکادا کۆتایی پێ بهێنرێت و وتی ئەو هەواڵانەی دەستوەردانی ڕوسیا دروستکراوی بەڕێوبەری پێشووی ئێف بی ئای جەیمس کۆمین.
سەرچاوە/ ڕۆیتەرز