ڕوانگەی سوری بۆ مافەکانی مرۆڤ وتی هێرشە ئاسمانییەکان بۆ سەر باکووری ڕۆژئاوای سوریا زیادی کردووە و ئەوەش بۆتە هۆی ئەوەی هەزاران هاوڵاتی مەدەنی لە شارۆچکەی خان شیخۆن هەڵبێن.
جێی ئاماژەیە ساڵی ڕابردوو ڕوسیای هاوپەیمانی سەرەکی بەشار ئەسەد و تورکیای هاوپەیمان لەگەڵ ئۆپۆزسیۆنی سوریادا ڕێکەوتن لەسەر ئاگربەست لەو ناوچەیەدا.
هەزاران هاوڵاتی سوریا ناوچەکانی دیکەی سوریایان بەجێ هێشتووە و هەڵهاتوون بۆ ئەو ناوچانەی دیکە کە ئاگربەستیان تێدایە. لایەنەکانی جەنگ و هاوپەیمانەکانیان لەنزیکەوە چاودێری ئاگربەستەکە دەکەن.
بەڕێوبەری ڕوانگەی سوری ڕامی عەبدولڕەحمان وتی هێزەکانی حکومەتی سوریا بۆردومانەکان و هێرشە ئاسمانییەکانیان چڕتر کردۆتەوە.
وتیشی بۆردومانەکان زیاتر ئەو ناوچانەی گرتۆتەوە کە دەکەونە سەر ڕێگای دیمەشق-حەلەب و خان شیخۆنیش چۆڵ بووە.
دەزگاکانی ڕاگەیاندنی سوریا وتیان چەکداران موشەکیان هاویشتووە بۆ چەند شارۆچکەیەک لە بەشی باکووری حەما و ئەوەش بۆتە هۆی کوژرانی هاوڵاتییەکی مەدەنی و برینداربوونی حەوت کەسی دیکە.
سەرچاوە/ ڕۆیتەرز