سەرۆکی ئێران حەسەن ڕۆحانی لە میانەی وتارێکی ڕۆژی شەممەیدا گوتی میرنشینە یەکگرتووەکانی عەرەب (ئیمارات) "هەڵەیەکی گەورەی" کردووە بۆ ڕێککەوتن لەسەر ئاسایی کردنەوەی پەیوەندییەکانی لەگەڵ ئیسرائیلدا و زۆر بە توندی ئەو هەنگاوەی ئیماراتی ڕەتکردەوە و بە هەنگاوێکی تاکلایەنەی وڵاتێکی کەنداو ناودێریکرد.
لە وتارەکەیدا ڕۆحانی هۆشداری بە ئیمارات دا دژ بەوەی ڕێگە بدات ئیسرائیل پێگەی خۆی لە هەرێمەکەدا بەهێز بکات. ئەو گوتی " ئەوان پێویستە بیر بکەنەوە. هەڵەیەکی زۆر گەورەیان کردووە، کردارێکی زۆر مەترسیدارە. هیوادارین درکی پێبکەن و ئەم ڕێگە هەیەڵەیە بەردەن."
سەرۆکی ئەمەریکا دانۆڵد ترامپ ڕۆژی پێنجشەممە ڕایگەیاند میرنشینە یەکگرتووەکانی عەرەب (ئیمارات) و ئیسرائیل قایل بوون بە دامەزراندنی پەیوەندی دیپلۆماسی پێکەوە.
سەرۆک ترامپ لە تویتێکدا بەیاننامە هاوبەشەکەی نێوان هەر سێ وڵات ڕاگەیاندوو بە " ساتەوەختێکی ڕاستەقینەی مێژوویی" ناودێری کرد.
ئیمارات دەبێت بە سێهەم وڵاتی عەرەب و یەکەم وڵاتی کەنداوی عەرەب کە پەیوەندی دیپلۆماسی لەگەڵ ئیسرائیلدا هەبێت. لە ئێستادا میسر و ئوردن تەنها وڵاتی عەرەبن کە پەیوەندی دیپلۆماسییان لەگەل ئیسرائیلدا هەیە.
سەرۆک ترامپ گوتی " لە ئێستادا کە پەیوەندییەکان دروست بوون چاوەڕوان دەکەم وڵاتانی تری عەرەبیش چاو لە ئیمارات بکەن."
وەزیری دەرەوەی ئەمەریکا مایک پۆمپەیۆش لەسەر ڕێککەوتنەکە گوتی " ئەمە دەستکەوتێکی مێژووییە بۆ دووان لەو وڵاتانەی جیهان کە هەرە پێشکەوتوون لە بواری تەکنەلۆژیادا، و گوزارشت لە دیدی هاوبەشیان دەکات لە ڕووی تێکەڵبوونی ئابوری هەرێمییەوە."