وەزیری دەرەوەی ئەمەریکا مایک پەمپیۆ وتی پێشبینی ئەوە دەکات لە کۆبوونەوەکانی کۆمەڵەی گشتی نەتەوە یەکگرتووەکاندا چاوی بە هاوتا ڕوسییەکەی سێرگەی لاڤرۆڤ بکەوێت.
پەمپیۆ سەبارەت بە پلانی کۆبوونەوەکەی لەگەڵ لاڤرۆڤدا وتی " من دڵنیام لەوەی ئامادە دەبێت و کاتمان دەبێت کۆببینەوە." وتیشی " ئێمە هەوڵدەدەین زەمینەیەکی هاوبەش لە نێوانماندا بدۆزینەوە لە هەر بوارێکدا بێت بتوانین کاری تێدا بکەین لەگەڵ ڕوسەکاندا."
وتیشی لە زۆر ڕووەوە مۆسکۆ دژی ئەمەریکا کار دەکات و ئێمەش لەسەر ئەوە لێپێچینەوەیان لەگەڵدا دەکەین.
جێی ئاماژەیە واشنتن نیگەرانە سەبارەت بە پلانەکانی ڕوسیا بۆ پێدانی سیستمی موشەکیی ئێس-300 و وتی ئەوە دەبێتە هۆی زیادکردنی گرژییەکانی ناوچەکە لەلایەن مۆسکۆوە کە پشتیوانی لە حکومەتی سوریا دەکات لە جەنگی ناوخۆی ئەو وڵاتەدا.
سەرچاوە/ ڕۆیتەرز