Accessibility links

پۆلیسی نیوزلەندا کەسێکی کوشت کە لە سوپەرمارکێتێک بە چەقۆ هێرشی کردە سەر 6 کەس


سەرۆک وەزیری نیوزلەندا جاسیندا ئاردێرن

سەرۆک وەزیری نیوزلەندا جاسیندا ئاردێرن وتی پۆلیسی نیوزلەندا تەقەیان لە " توندڕەوێک " کردووە کە لەلایەن پۆلیسەوە ناسراو بووە و کوشتوویانە، ئەوەش دوای ئەوەی لە سوپەرمارکێتێکدا بە چەقۆ هێرشی کردۆتە سەر شەش کەس و برینداری کردوون.

ئاردێرن وتی هێرشبەرەکە کە خەڵکی سریلانکایە و 10 ساڵە لە نیوزلەندا دەژی، کاریگەریی ڕێکخراوی داعشی لەسەر بووە و بە بەردەوامی لەژێر چاودێری پۆلیسدا بووە.

ئاردێرن بە ڕۆژنامەنووسانی وت " توندڕەوێکی توندوتیژ هێرشێکی تیرۆریستی دژی هاوڵاتیانی بێتاوانی نیوزلەندا ئەنجامدا."

وتی " بە ئاشکرا دیار بووە پشتیوانی لە ڕێبازی داعش کردووە."

ئاردێرن وتی ماوەی پێنج ساڵە هێرشبەرەکە " گومانلێکراوە "، لە ماوەی 60 چرکەدا دوای دەستپێکردنی هێرشەکە لە شاری ئۆکلاند کوژراوە.

شایەتحاڵێک وتی هێرشبەرەکە هاواری " اللە اکبر " ی کردووە. سەرۆکی پۆلیس ئاندرو کۆستەر بە ڕۆژنامەنووسانی وت هێرشبەرەکە بە تەنها بووە و پۆلیس دڵنیایە لەوەی هیچ هەڕەشەیەکی دیکە بۆ سەر هاوڵاتیان نیە.

کۆستەر وتی " ئەوەی لەتواناماندا بووبێت کردوومانە بۆ چاودێریکردنی و بێگومان ئەو ڕاستیەی کە توانیمان بە خێرایی بگەینە سەری ، لە تەنها 60 چرکەدا، دەریدەخات چەندێک لە نزیکەوە چاودێریمان کردووە."

سەرچاوە/ ڕۆیتەرز

XS
SM
MD
LG