ڕابەری ئۆپۆزسیۆنی ڕوسیا ئالێکسی ناڤاڵنی لە لێدوانێکدا بۆ ڕۆژنامەی دەیر شبیگڵی ئەڵمانی وتی سەرۆکی ڕوسیا ڤلادیمێر پوتن بەرپرسە لە ژەهراویبوونەکەی و جەختی لەوە کردەوە ناترسێت.
لە مانگی هەشتدا ناڤاڵنی لە ڕوسیاوە گواسترایەوە بۆ بەرلین بەهۆی ئەوەی گومانی ئەوەی لێکرا ژەهراویکرابێت. بۆ ماوەی 32 ڕۆژ لە نەخۆشخانەی شاریتییەی بەرلین چارەسەری وەرگرت و لە مانگی نۆدا لە نەخۆشخانە هاتە دەرەوە.
ناڤاڵنی بە ڕۆژنامەکەی وت " دەڵێم پوتن لەپشت تاوانەکەوەیە و هیچ چیرۆکێکی دیکەم نیە بۆ ئەوەی کە ڕوویدا."
وڵاتانی ڕۆژئاوا داوا لە ڕوسیا دەکەن ڕوونکردنەوە بدات لەسەر ڕووداوەکە، بەڵام مۆسکۆ ڕەتی دەکاتەوە دەستی هەبووبێت تیایدا و دەڵێت هیچ بەڵگەیەکی تاوان لە ئارادا نیە.
هەروەها سەبارەت بەو ساتەی کە ماددە کیمیاییەکە کاری تێکردووە ناڤاڵنی وتی " هەست بە هیچ ئازارێک ناکەیت بەڵام دەزانیت کە خەریکە گیان لەدەست دەدەیت."
وتیشی دەگەڕێتەوە بۆ ڕوسیا و " ئەرکی سەرەکیم لە ئێستادا ئەوەیە بەبێ هیچ ترسێک بمێنمەوە. هەست بە هیچ جۆرە ترسێک ناکەم."
سەرچاوە/ ڕۆیتەرز