سەرۆکی کۆریای باشوور موون جەی ئین وتی هیچ شەڕێک ناکات لە نیمچە دوورگەی کۆریا سەرەڕای زۆربوونی گرژییەکان لەوەتەی کۆریای باکوور نوێترین تاقیکردنەوەی ناوەکیی ئەنجامداوە.
موون وتی لەگەڵ سەرۆکەکانی ڕوسیا و ژاپۆن و ئەمەریکادا گفتوگۆ دەکات بۆ ئەوەی بزانن چۆن چارەسەری بابەتەکە بکەن.
وتەبێژی وەزارەتی دەرەوەی کۆریای باشوور وتی هەندێک ڕێوشوێن هەن کە زۆر کرداری و بەهێزن و دەتوانن کۆریای باکوور ئازار بدەن و دەبێت بخرێنە ناو لیستی سزا نوێیەکانەوە کە وابڕیارە نەتەوە یەکگرتووەکان ڕایبگەیەنێت.
هەروەها دەزگای هەواڵی کیودۆ لەزاری بەرپرسێکی ژاپۆنەوە بڵاویکردەوە کە سەرۆک وەزیری ژاپۆن شینزۆ ئابی و سەرۆکی کۆریای باشوور موون جەی ئین داوا لە ڕوسیا و چین دەکەن پشتیوانی لە سەپاندنی سزا نوێیەکان بکەن بەسەر کۆریای باکووردا.
سەرچاوە/ ڕۆیتەرز