ڕاوێژکاری ئەڵمانیا ئانگێلا مێرکڵ وتی وەزیرەکانی دەرەوەی یەکێتی ئەوروپا لە سەرەتای هەفتەی داهاتوودا گفتوگۆ لەسەر سەپاندنی سزای زیاتر دەکەن بەسەر کۆریای باکووردا بەهۆی بەرنامە ناوەکیی و موشەکییەکەیەوە و ئەوەش زۆر پێویستە.
مێرکڵ بە ئەنجومەنی نوێنەران " بۆندستاج"ی ڕاگەیاند کە تاقیکردنەوە ناوەکییەکانی کۆریای باکوور پێشێلکردنی هەموو یاسا نێودەوڵەتیەکانە.
وتیشی " بە ڕوون و ئاشکرا و بەناوی حکومەتەوە دەڵێم ... بێجگە لە چارەسەری سیاسیی هیچ چارەسەرێکی دیکە نابێت هەبێت."
هەروەها سەرۆکی ڕوسیا ڤلادیمێر پوتن بە پێچەوانەی مێرکڵەوە وتی توندکردنەوەی سزاکانی سەر کۆریای باکوور بێ مانایە و هیچ شتێک لە سەرکردایەتی پیۆنگیانگ ناگۆڕێت.
سەرچاوە/ ڕۆیتەرز